Wednesday, 01 October 2014
Gobierno: Boluntarionan di Parokia di Paradera ta bay haci uzo di ex-edificio di Dr. Jaramillo Print E-mail
Friday, 15 March 2013 22:03

front-paradera001

Na Paradera diaranson mainta a cuminsa cu trabounan na unda antes tabata consultorio di dr. Jaramillo, na otro banda di caminda di edificio di Wit Gele Kruis. Ekiponan di trabou pisa di SERLIMAR a cuminsa for di tempran caba pa kita sushi for di e tereno y despues di e edificio mes.

Mirando e desaroyonan di e trabounan na otro banda di caminda, e pareha Dora y Chinto Croes tabata splica cu e edificio awor ta bay wordo uza pa un organisacion di asistencia social pa yuda esnan menos fortuna, di e districto, pero tambe di Aruba en general. E organisacion, di parokia di Misa di Paradera, tin hopi tempo ta busca un localidad caminda nan por haci e trabounan boluntario y social un poco mas miho y efectivo. Despues cu hos a destrui varios parti di e Misa di Paradera, e localidad cu e organisacion tabata uza tambe a sufri daño. Pero e tempo aya caba e local ey mes tabata hopi chikito pa e boluntarionan por haci nan trabou adecuadamente, awor e ta hopi mas pio. P'esey, cu e boluntarionan di parokia di Paradera awor por haci uzo di un edificio mas amplio y alabes cerca di nan Misa, ta algo mucho mas miho. Un poco despues, Prome Minister Mike Eman a yega na e sitio pa wak pa su mes e desaroyonan cu tin rond di e localidad. Prome Minister a splica cu pa hopi tempo caba e boluntarionan di e parokia tabata tin mester di un local mas adecua pa nan trabounan boluntario. Sra. Dora Croes a aserc'e y combersa cu ne riba e situacion varios biaha, tur caminda cu nan topa, Sra. Dora ta corda Sr. Eman riba e proyecto pa e organisacion prokial di Paradera. Manera tanto Sr. Eman como Sr. Croes ta splica, e proceso a tuma su tempo, pero porfin ta asina leu. “Mi ta contento cu nos por a asisti Sra. Dora y su casa Chinto y tur esnan den e organisacion. E ta forma parti tambe di e pensamento cu gobierno ta haci su esfuerso, ora cu e esfuerso ey wordo sosteni tambe pa iniciativanan di organisacionnan boluntario di por ehempel misa, scol, bario of di mayornan, hunto nos ta haci un forsa mas grandi pa por asisti esnan cu ta den necesidad,” Prome Minister Eman a splica. Finalmente a yega e punto cu ta asina leu cu SERLIMAR, DIP, GKMB y otro instancianan envolvi a cuminsa cu e trabounan pa prepara e edificio y e tereno rond di dje pa asina por cuminsa haci e edificio uno apto pa funciona como un centro di boluntario. Ta premira cu e trabounan por dura algun siman pa nan organisacion parokial di asistencia por cuminsa nan trabounan den e edificio. Sr. Eman a splica tambe cu, mescos cu ta purba restaura edificionan rond di Aruba, ta haci den e caso aki tambe. Hopi edificio tin un balor historico of monumental, pero tambe edificionan di e tipo aki ta “parti di un capital cu ta inverti caba. Si bo no haci maximo uzo di dje, ta loke nan ta yama na Hulandes, Kapitaalvertnietiging.” Sra. Dora Croes a gradici Prome Minister Mike Eman pa su esfuerso y cumplimento den e proceso aki. Por a mira cu e gratitud ta mutuo, pasobra di banda di Prome Minister, e ta un ayudo na un grupo boluntario cu ta haci trabounan importante u necesario den nos comunidad.

gallery1 gallery1 gallery1
gallery1 gallery1 gallery1

Comentarionan (1)Add Comment
eta curiel-croes
March 16, 2013
86.91.142.233
Votes: +1
...

Hopi contento pa bo Dora, Chinto y tur e otro boluntarionan cu ta juda den parokia. Pabien cu boso logra y Dora Croes merese un Koninklijke Onderscheiding pa mas cu 40 anja ta un bolontaria den su parokia Paradera y den otro districto. Ta bira tempo pa e wordo gewaardeerd pa su bon trabao (sin pago) cu ela hasi y ainda ta haciendo. Dora Croes bo ta un bon hende pa esun nan cu ta den necesidad. Ami a mira su trabao cu mi mesun wowo pa hopi anja Dora Croes ta juda den comunidad. Danki Dora pa bon bon trabao y cu Dios duna bo forza pa sigi hasi bo bon trabao pa hopi anja mas.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter