Monday, 22 December 2014
Aruba DOET a ranca sali mainta oficialmente na Savaneta Print E-mail
Friday, 15 March 2013 21:58
Comparti

front1

Diabierna mainta Daniel Tecklenborg e director di CEDE Aruba a hiba palabra durante apertura di Aruba DOET. El a dirigi su mes na gobernador di Aruba den e siguiente forma cu un discurso. Su Excellencia, Gobernador di Aruba, Sr. Refunjol, Directiva y team di CEDE Aruba, Personal di SABA, especialmente di Huize Maristela, boluntarionan, tur persona di medionan di comunicacion y televidentenan.

Den nomber di nos directiva y como director di CEDE Aruba y tambe den nomber di Oranje Fonds, e iniciador di e proyecto NL DOET, mi tin e honor di yama boso tur bon bini na e apertura oficial di ARUBA DOET. Awe ta un dia hopi special. Awe ta e dia cu nos ta inicia e proyecto ARUBA DOET pa prome biaha akinan na Aruba. E proyecto ARUBA DOET ta un iniciativa briyante cu ta lanta e interes general pa trabou boluntario y cu ta duna tur cuidadano den nos comunidad e oportunidad pa traha hunto cu un obhectivo colectivo. ARUBA DOET ta motiva nos comunidad pa pone e bienestar general na un lugar mas halto cu e deseonan propio. Nos lo yuda nos organisacionnan local cu e lema: Haci bon y pasa bon! Durante e dia di awe y e dia di mayan, mas cu 1700 boluntario lo yuda mas cu 75 organisacion pa realisa 87 trabou. Tur hende ta bai traha duru pa un miho Aruba. Diferente tipo di organisacion ta participa: manera organisacionnan social, di deporte, di cuido, di cultura y scolnan. Nos lo verf, drecha cura y edificio, planta mata, traha podium dak y mesa, ehecuta actividadnan social y hopi mas. Danki na e talento organisatorio di tur organisacion, desde otro siman lo tin hopi hende y cliente cu lo ta mas contento cu awe. Tur esaki ta posibel danki na e esfuerzo di hopi persona. Awor caba nos kier gradici cada persona involvi, cada famia, cada grupo di amigo, cada fundacion y cada scol. Tambe nos kier gradici cada compania cu ta facilita trahador, fondo y medionan. Nos ta gradici boso tur pa boso envolvimento. Na nomber di Oranje Fonds y CEDE Aruba mi ta desea tur organisacion y boluntario hopi exito. Prome cu nos bai over na e inicio oficial, mi ta pidi pa nos para keto un rato cu Aruba no ta e unico pais cu ta organisa e evento aki. ARUBA DOET ta forma parti di un accion mas grandi den nos Reino. Durante e dia di awe y mayan lo tuma lugar e mesun accion na Hulanda bou number di NL DOET y na Bonairo bou nomber di BON DOET. Asina nos ta traha conhuntamente pa engrandece boluntarismo den Reino. Como centro y motor di desaroyo pa nos NGOnan local, CEDE Aruba ta masha orguyoso mes pa forma parti di esaki. Awor mi tin e gran honor pa invita Su Excelencia, Gobernador di Aruba, pa habri e evenemento di ARUBA DOET oficialmente y pa planta un mata como simbolo di inicio di ARUBA DOET 2013.

gallery1 gallery1 gallery1
gallery1 gallery1 gallery1

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter