Prome Minister Mike Eman: FCCA ta entrega casnan digno den e ambiente cu nos grandinan merece

Friday, 15 March 2013 20:58

Den un ambiente festivo FCCA a celebra cu e proyecto ’20 cas pa nos grandinan’ na Paradera a keda cla. E interes pa a proyecto aki durante e atardi tabata inmenso. Director di FCCA Peter van Poppel a mustra su satisfaccion cu e proyecto bunita y excepcional aki a keda cla y mas ainda completamente acaba. Prome Minister di Aruba Mike Eman, kende semper a mustra su interes den e comunidad di Aruba y pa nos grandinan en especial, ta otro persona feliz cu e proyecto a wordo entrega.

“Awe nos ta para dilanti di un otro proyecto importante di FCCA pa pais Aruba. Aunke cu tin un bon cooperacion entre FCCA, gobierno di Aruba y nos comunidad, toch ta importante pa remarca cu den un tempo cortico por a mira e cooperacion entre FCCA y gobierno di Aruba bay mas leu cu durante hopi aña nos a conoce. FCCA y gobierno di Aruba a dicidi pa tuma e necesidadnan di nos comunidad, e deseo di nos hendenan na curason”. Referiendo na esaki Eman a bisa cu hunto a bay den e barionan unda tin casnan di FCCA y a percura pa nan a wordo renoba. “Caminda no tabatin cura, nos a pone cura. Unda cu e casnan tabata cay den otro, nos ta restaurando nan. Unda cu tabata falta caminda dilanti e casnan, nos ta construyendo esakinan y tambe pone luz. Caminda cu tabatin hobennan sin trabou, FCCA, hunto cu gobierno a bin cu un programa ‘Pinta Bo Bario’ pa e hobennan haya un trabou di haci mientras cu e casnan ta wordo drecha”. Eman a pidi y a haya un fuerte aplauso pa e trabounan comunitario y di dedicacion cu FCCA a bin ta haci y e cooperacion cu a crea e ultimo añanan. “Hopi bes nos ta cana den barionan y nos ta tende critica. Cu FCA tin bes ta duro ora tin un retraso den pago. Nos a compronde cu tabatin mester di un bon comunicacion entre e comunidad y FCCA. Gobierno a haci un esfuerso pa hunto cu FCCA mehora e comunicacion aki y mehora e comprension”. Eman a sigui bisa cu ta p'esey e ta masha orguyoso di por bisa cu FCCA hunto cu gobierno ta canando riba e caminda social cu ta e raiz di e pensamento di FCCA pa Aruba. “Cas pa Comunidad, cas pa esnan di menos recurso, cas pa nos grandinan y awe nos ta mira cu e pensamento y idea aki ta haya su contenido real”. Prome Minister Eman a bisa esnan presente cu si su mama tabata na bida, cu e dia ey, riba 14 di maart e lo a celebra su cumpleaños. “Ora nos biba cu nos grandinan na e momentonan cu nan ta bira mas vulnerabel y cu nan mester di nos yudansa ora di cana di un porta pa otro y na momento cu nan mester lanta for di cama nan mester di nos sosten, anto nos como comunidad y como hende ta bira mas consciente pa e responsabilidad cu nos tin pa esnan cu a lanta nos na momento cu nos no por a cana. Pa esnan cu a kita e lagrimanan di nos cara na momento cu porta nos no tabata compronde mundo. Esnan cu a brasa nos y a duna nos inspiracion y un bon educacion. Un comunidad ta wordo midi na e forma con e ta trata su grandinan. Awe FCCA hunto cu Aruba ta mustra e forma con nos kier trata nos grandinan”, Prome Minister a bisa un poco emociona. “FCCA ta entrega casnan digno den un ambiente cu nos grandinan merece. Den un ambiente cu nan por biba cu otro cu e miho trato cu nos comunidad ta ofrece. Danki FCCA y tur esnan cu a contribui na e proyecto aki”. Na final Eman a bisa cu e mision mas grandi cu un persona tin den bida ta di cuida esnan cu mester di su yudansa. Pa cuida esnan mas vulnerabel den un comunidad.