Thursday, 31 July 2014
Gobierno: Green S Cool ta creando consenshi entre studiantenan pa medio ambiente Print E-mail
Monday, 11 March 2013 19:36

green skol

E serie di presentacionnan cu Prof. dr. Wubbo Ockels y Javier St. Jago ta haci na scolnan secundario di nos isla ta continua e siman aki den cuadro di e programa ‘Green S Cool’ cu ta parti di proyecto BoAruba. A toca turno na Maria College caminda seis diferente klas a haya e oportunidad hunto cu nan docentenan, pa presencia un lectura cu ta relata e experiencia di Prof. dr. Ockels como astronauta, su biahe den espacio, su lucha pa preserva medio ambiente y su aventura abordo di e barco ‘Ecolution’ for di Hulanda pa Aruba.

Un punto hopi importante di e encuentro aki ta cu e ex astronauta y cientifico cu ta den un relacion di cooperacion cu BoAruba den e meta pa na 2020 Aruba ta completamente independiente di combustibel fossiel, ta encurasha e hobennan pa nan tambe aporta cu nan grano di arena na proteccion di nos planeta. Cu e lema di “Nos tur ta astronauta di e nave espacial Tera” Ockels ta refleha e responsabilidad di e futuro di nos mundo, ta den man di cada un di nos y cu ta Green no ta nifica di haci menos of goza menos, pero djis haci cosnan di un manera diferente. Edmond de Cuba, docente Persoonlijke Vorming, Natuur en Techniek y Biologie na Maria College a comenta despues di a tende e lectura cu esaki “A bay hopi bon. Mi a wak hopi entusiasmo y interes. E muchanan tabata hopi impresiona cu e parti cu Prof.dr. Ockels a bay den espacio.” Tambe Sr. de Cuba a splica cu e muchanan tin algun tempo caba tratando e tema. “Nos tin un par di siman bezig ta duna e muchanan informacion; pone nan pensa riba e topico y tambe e proyecto di ‘Green S Cool.’ E programa ta consisti di presentacionnan cu Prof.dr. Wubbo Ockels, hunto cu e studiante Arubiano Javier St. Jago, ta duna na un gran cantidad di scolnan secundario riba nos isla. Tambe ta inclui un competencia caminda studiantenan ta forma ekipo y docentenan ta fungi como guía. E docentenan aki ta haya un tour riba e barco ‘Ecolution’ pa asina nan ta miho informa y prepara pa yuda nan studiantenan. E programa di ‘Green S Cool’ lo continua cu workshop pa e ekiponan participante. E workshopnan aki lo tuma luga na Biblioteca Nacional cu asistencia di Dr. Ockels y otro expertonan di e industria di energia sostenibel. Na fin di april of mas tardi na inicio di mei lo tin un ceremonia pa reconoce e studiantenan cu a participa den ‘Green S Cool’. De Cuba a splica cu a parti e klasnan den gruponan chikito y pone nan brainstorm riba accionnan simpel, manera ora cu tin pauze pa paga e luz. Nan mes ta bin cu e ideanan aki, di e manera ey ta conscientiza nan riba e consumo di energia na scol. Despues ta bin un di dos tarea cu ta similar, esta di bin cu sugerencia pa spaar energia, pero e biaha aki, na cas. Ta spera cu e entusiasmo, conseshi y conocemento ta contagia e mayornan y cu asina henter pueblo ta miho educa riba e pasonan chikito cu por tuma, pero cu nos tur hunto, ta haci un diferencia grandi. Otro informacion cu e hobennan a haya for di scol mes ta un module di electricidad caminda nan ta siña calcula cuanto kilowatt/uur nan ta gasta y cuanto esey ta costa. “Mi ta spera cu ora nan finalisa e proyecto aki cu e interes ta bira mas grandi pa sigui un carera riba tereno di tecnologia y ecologia,” e docente a indica. Adicionalmente e ta contento di wak cu gobierno di Aruba a tuma e prome stap pa un miho forma di biba. “Awor nos ta wak cosnan concreto ta pasa. Hobennan ta involucra y en berdad hopi cos ta wordo haci; e molinanan tey y tin yen di otro proyecto cu ta bay bin. Awor ta keda na nos pa sigui y stimula e muchanan paso aki 50 aña ta nan ta den dje y sigui cune,” de Cuba a finalisa bisando. Di e manera aki Gabinete Mike Eman ta sigui traha riba su plan pa haci di Aruba un pais cu ta liber di combustibel fosil pa aña 2020, ademas di conscientisa hobennan di e sinti di responsabilidad ambiental y amplia e curriculum educativo. E muchanan hunto cu docentenan ta spaar energia loke ta reduci gasto di utilidad y esey ta fondonan cu por bay destina pa otro actividadnan escolar manera deporte, arte y mucho mas.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter