Thursday, 27 November 2014
Gobierno: Watertoren San Nicolas Totalmente Renova Print E-mail
Sunday, 10 March 2013 21:43
Comparti

watertoren

Faltando algun dia pa entrega e proyecto di restauracion di Watertoren na San Nicolas, ta bon pa tira bista riba henter e proyecto den conhunto cu esun di Oranjestad cu a keda cla aña pasa. E trabounan pa rescata ambos edificio di e consecuencianan di tempo, ta forma parti di e Plan BoBario caminda ta dunando atencion na e mehoracion di tur skina den isla, den tur su aspecto, tanto di infrastructura, vivienda y e edificio, como tambe convivencia social.

Den e caso di e Watertoren na Oranjestad y San Nicolas, e compania nacional di produccion y distribucion di awa potabel, WEB Aruba N.V., a hunga un rol esencial como propietario. E compania a hereda e edificionan aki despues cu a pasa for di Landswatervoorzieningdienst pa su identidad y structura actual. Na 1991 WEB Aruba N.V. tabata haciendo trabounan di mantencion den centro di Oranjestad. Ademas di sanea tubonan grandi den cayanan di Playa, a saca for di servicio e tubonan cu tabata conecta e watertoren cu e red di distribucion di awa. Pa e tempo aki ya caba e tanki tabata bashi y e watertoren no tabata den funcion. Na 2003, 64 aña despues di nan construccion, WEB Aruba N.V. a traspasa e propiedadnan di Watertoren na Oranjestad y San Nicolas pa Fondo di Monumento pa e suma simbolico di 1 Florin. E tramite aki a wordo realisa dor di notario mr. Faride Tjon Ajong den presencia di Director di WEB Aruba N.V. di e tempo ey, ing. Jossy Laclé y otro testigonan. E Watertoren di San Nicolas a wordo saca for di servicio na final di e mesun aña. Prome cu esey, na 1997, a haci un traspaso economico cu a habri caminda pa Fondo Monumento por a cuminsa traha riba e plan pa restaura e edificionan pendiente pa a finalisa e aspecto huridico di e traspaso. Obviamente e watertorennan no por cumpli mas cu nan meta original di suministra awa na e bario di Oranjestad y San Nicolas. Esun na Playa, por ehempel, cu su capacidad di 375 meter cubico ta 30 biaha menos di loke e area tin mester y ta haya actualmente su awa for di tanki riba Mondi Fierno. Adicionalmente e presion di awa cu e watertoren por ofrece ta hopi abou. Sinembargo, no kier kita balor di e hecho cu e watertorennan ta representa e inicio di distribucion di awa na Aruba den un manera profesional y moderno pa e tempo ey. Nan ta muestra palpabel di historia, arkitectura y desaroyo economico di nos isla. Nan conservacion ta nifica cu generacionnan actual y den futuro por siña y compronde e historia y crecemento di Aruba. Di awor padilanti e edificio di Watertoren na San Nicolas lo fungi como un museo pa e companianan di utilidad nacional por mustra bishitantenan local, turista y nos hobennan e historia y desaroyo di e servicionan basico riba nos isla. Plan Bo Aruba ta dunando Aruba un cara nobo, un producto nobo, creando asina un miho Aruba pa un y tur. Aruba ta cambiando y Aruba ta renobando su mes. Ehempelnan tin tur rond di Aruba, manera trabounan den Oranjestad, pero tambe pariba di brug, ,manera Jara y Yuwana Morto Complex, Village y e parke dilanti di Postkantoor na San Nicolas djis pa menciona algun. Watertoren di San Nicolas awo ta wordo agrega na e lista largo di proyectonan bou di Bo Aruba cu ta keda cla.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter