Monday, 01 September 2014
ATA a dicidi di no renoba contract di "Aruba International Film Festival" Print E-mail
Sunday, 10 March 2013 21:29

Ronella Tjin Asjoe-Croes

Eventonan semper a forma un parti integral di e strategia di Aruba Tourism Authority (ATA) pa atrae promocion maximo pa Aruba y atrae mas bishitante pa Aruba, como tambe diversifica nos mercado di turismo. Asina inversionnan grandi ta y a wordo haci den diferente evento, cual despues ta wordo evalua riba diferente criterio estricto pa determina si Aruba Tourism Authority lo sigui brinda apoyo financiero y den ki cantidad.

Ta den e cuadro aki ATA a dicidi di no renoba e contract cu Aruba International Film Festival (AIFF), despues cu e contract a caba aña pasa. Como un entidad "sui generis", ATA a dicidi di sigui sostene algun evento existente (na 2010 ora e entidad a transforma pa un entidad “sui generis”) cual ta atrae un balor specifico den Public Relations (PR) y/of ta atrae un cantidad specifico di turista. Na momento cu ATA cera un acuerdo cu organisadonan di un of mas evento, e dos aspectonan aki ta wordo inclui den e contract. Tambe ta uza otro criterionan, manera por ehempel e calidad di e evento y ademas ATA tambe ta conduci un "audit" di e balor di PR (PR value) y e cantidad di bishitante, como tambe "financials", o sea e fondonan inverti dor di ATA. E evaluacionnan aki ta wordo haci pa un of mas compania of entidad independiente , y for di tempo cu ATA a drenta den su posicion legal nobo como "sui generis" el a bin ta conduci evaluacionnan a base di e diferente aspectonan aki. Pa loke ta trata Aruba International Film Festival (AIFF), aña pasa tabata e di tres festival, cual a marca final di e acuerdo di tres aña cu ATA tabatin cu e organisadonan. E resultadonan pa loke ta trata "PR" tabata bon, pero e relato financiero a wordo entrega na februari 2013, cual no ta cumpli cu e contract y no a permiti ATA pa conduci e evaluacion necesario. Esaki, combina cu e viabilidad financiero di e evento, pues e posibilidad pa e evento ta financieramente sostenibel, a conduci na e decision di ATA pa no sigui cu e evento aki. Ta importante pa subraya cu Aruba Tourism Authority ta haci, den caso di inversion den evento (y otro inversionnan), na tur momento e "due diligence" necesario pa asina sigura cu inversionnan ta wordo haci na un manera responsabel y efectivo. Hopi enfoke ta wordo poni riba e aspecto aki. ATA ta reconoce e organisado di AIFF, Jonathan Vieira pa e tremendo trabao di PR cu el a haci, como tambe pa tur su esfuersonan haci pa cu e evento y ta gradici’e pa esaki. ---- Aruba Tourism Authority tin como meta pa ta un organisacion di mercadeo innovativo y efectivo cu ta posiciona e marca Aruba como e destinacion turistico di prome nivel, enfocando riba calidad di e experiencia y di turismo pa Aruba. Sea cu Bo ta traha den e industria turistico of den cualkier otro ramo, nos tur por tin un impacto positivo riba turismo di Aruba y bienestar di nos economia y di nos isla. Pa mas informacion subi e website: www.aruba.com of “like” nos riba facebook/oficinaditurismo".

Comentarionan (1)Add Comment
Pagami bek
March 11, 2013
201.229.6.162
Votes: +0
...

Awo con a para cu tur e debe nan? Meneer Vierra tin plan di paga hende bek? te ainda e no a paga niun hende bek! NIUN HENDE NO TA PAPIA DI ESAKI???

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter