Friday, 24 October 2014
E Water Toren na San Nicolas a wordo restaura! Print E-mail
Sunday, 10 March 2013 19:38

1

E fase di construccion di e proyecto di restauracion di e Water Toren na San Nicolas a yega su conclusion. Rene Kan, Presidente di e Monumentenfonds riba e isla, a expresa un gran sentido di satisfaccion despues di a ricibi e edificio for di e compania di construccion, completamente restaura pa su gloria formal, prome cu e mester a wordo entrega, y pa menos cu a wordo presupuesta.

Dos entidad gubernamental a colabora riba e restauracion di e water toren historico, esta Stichting Monumentenfonds, y e Monumentenbureau. Mientras cu e prome organisacion a busca e financiamento pa e proyecto di restauracion, e di dos organisacion a hiba mando di e proyecto, supervisando tur aspecto tecnico di e operacion. Kan, kende ta Presidente di e fundacion, ta raporta cu e proyecto a cuminsa riba dia 2 di April, 2012, y tabata programa pa conclui riba dia 2 di April, 2013. E edificio, el a bisa, a wordo pasa pa e Monument Bureau riba dia 8 di Maart, 2013, casi henter un luna prome cu e tabata programa pa keda cla. Ing. Yvonne Webb-Kock, Director di e Monumentenbureau, a duna pabien na Kan y Anne Witsenburg, e Director di Stichting Monumentenfonds Aruba, riba e tremendo noticia cu e fondonan cu nan a spaar cu e finalisacion trempan di e proyecto, mas o menos 5% di e inversion, lo wordo uza pa un otro proyecto di restauracion igualmente importante. Como presidente di Stichting Monumentenfonds, Kan a comparti e bon noticia cu nos comunidad, den bista di e hecho cu masha poco proyecto ta yega nan conclusion na ora y bou di e presupuesto, riba nos isla. Un cantidad di compania ta merece reconocemento, Kan a bisa, pa nan trabou y cooperacion excelente riba e proyecto. Nan ta entre otro, e Monumentenbureau, Earon Matthew di Plan D2 architecten bureau, como tambe companianan local manera PIB NV, HJC NV, Ace Civiel Laboratorium, Albo Aruba NV, CHS, Croon, ASA, Arubaanse Maatschappij y Martinez Landscaping. Segun Kan, e preparacion extensivo y planeamento meticuloso a mustra su frutanan, y mientras cu a tuma un tempo considerabel pa organisa cada detaye, bou di maneho solido y supervision atento, tur cos a bini hunto na un manera magnifico, apesar di e retonan tecnico cu naturalmente ta mara na e trahamento riba un edificio cu a wordo disenja na 1939! Bou di e maneho di Monumentenbureau, den colaboracion cu e architectonan y contratistanan, sub-contratistanan y conseheronan, Aruba awo por disfruta di un joya di un edificio historico. Ing. Yvonne Webb-Kock y tur di su asociadonan na e Monumentenbureau ta merece elogio pa e dedicacion cu nan ta mustra na cualkier proyecto cu nan ta cuminsa, y pa e hecho cu nan ta pusha tur hende den e direccion corecto, pa asina, un pa un, realisa e soño di e restauracion total di monumentonan na Aruba, rindiendo homenahe na e pasado y conectando esaki cu nos futuro. E water toren, cual tabata e propiedad di WEB Aruba NV, Aruba su agencia di awa, a wordo regala na e Monument Bureau, un cantidad di aña pasa. De hecho, Aruba ta bendiciona cu dos water toren identico y elegantemente diseña, cu un na Oranjestad restaura caba, y e di dos na San Nicolas. Ambos toren a wordo uza na final di e añanan 30, y a sirbi como reservoirnan di awa cu un capacidad maximo di 400 liter. E dos torennan a bira obsoleto ora cu WEB Aruba NV a habri su fabrica actual na Balashi. Subsecuentemente, e torennan di awa a acomoda varios oficina di gobierna, y ora cu nan a cuminsa mira daño y nan estado a empeora, nan a wordo abandona y nan estado a bira peor ainda. Den e añanan ultimo aki, e toren di San Nicolas a cuminsa cai pa un banda, y e necesidad pa restauracion tabata iminente, ya cu e miedo tabata cu e edificio lo cai den otro. Finalmente, cu e financiamento concretisa, e edificio a wordo salba y lo bira un bentaha pa e comunidad rond di dje. E conservacion di edificionan historico na Aruba a cuminsa na 1985 cu e meta di preserva monumentonan cu tabata den peliger di cai perdi. Cu e finalisacion di e restauracion di e water toren na San Nicolas, un otro pida di e isla su herencia cultural a wordo treci bek for di e punto di destruccion.

gallery1 gallery1 gallery1

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter