Thursday, 24 July 2014
Gabinete Mike Eman a Logra Mehoracion Importante den Finanzas Publico: A reduci deficit financiero cu mas di 180 miyon den presupuesto 2013 Print E-mail
Tuesday, 05 March 2013 19:51

demeza gabinete

“Na aña 2010 e deficit financiero a suma casi 500 miyon florin manera cu el a wordo laga atras dor di e Gabinete anterior: a bin haya un finanzas publico for di control, un fondo di pensioen den un estado hopi critico, un economia den recesion y falta di dialogo den comunidad y tambe cu partnernan strategico”, asina minister De Meza a cuminsa bisa.

For di un situacion di deficit financiero iresponsabel y tambe e fondonan publico den estado critico, a logra baha e p e deficit compara cu nos GDP di -9.4% na 2010 pa 4.5% na aña 2013. E mehoracion importante aki ta pone cu na 2014 e deficit lo yega na e norma internacional di 3% compara cu e GDP. “Gabinete Mike Eman – comprometi di hiba un finanza publico responsabel – a sa di desaroya un trend di reduccion di deficit den liña cu e cuadro financiero manera presenta na Parlamento na aña 2010”, minister de Meza a splica. Na final di aña 2009 ora cu Gabinete Mike Eman a tuma responsabilidad di Pais Aruba el a bin haya un refineria cera sin ningun perspectiva pa reanuda su actividadnan unda algun mil famia tabata sin entrada. Turismo – e pilar di nos economia – tabata den decadencia, unda cu e cantidad di turista a baha cu 14,000 bishitante y e asina yama RevPar na aña 2009 tabata 20% mas abou, si compar’e na e nivel actual danki na e maneho di Gabinete Mike Eman. “Entradanan for di turismo, cu ta igual na mita di nos GDP, a baha cu 300 miyon na aña 2009”, Minister de Meza a elabora. “E actividadnan economico a baha cu casi 9% na 2009 y desempleo tabata riba 10%”. Durante e periodo 2008-2010 e crisis cu Aruba a haya su mes confronta cu ne a resulta den un contraccion di rond di 15% di nos economia: un perdida di 500 miyon di florin cu no por a wordo recupera di manera retroactivo. “E maneho di Gabinete Mike Eman sinembargo a opta pa stimula economia, yuda esnan cu menos entrada y bin cu solucionnan structural pa e situacion di APFA, AZV, e fondonan di SVb y tambe FATF, sin tin nodo di introduci medidanan pa tranca e desaroyo economico di nos pais”, de Meza a splica. A pesar di e dificultadnan financiero a logra cambia e rumbo di finanzas publico den un tempo cortico. Danki na e esfuerso di Gabinete Mike Eman e entradanan di Pais Aruba a conta cu un suma di 210 miyon florin adicional procedente di Valero na 2010. Den e presupuesto di aña 2011 Gobierno di Aruba a conta cu un deficit financiero di 340 miyon florin cu a nifica un reduccion di mas di 60 miyon florin compara cu e aña anterior. Gabinete Mike Eman comprometi di hiba un finanza publico sostenibel y responsabel a bolbe reduci e deficit na aña 2012 cu 70 miyon florin yegando na un deficit financiero di rond di 270 miyon florin, esaki apesar di e suspension di actividadnan di e refineria. “Cu hopi satisfaccion por bisa awe cu e deficit financiero pa 2013 ta 223 florin – mas di 180 miyon florin menos di loke a ser hereda na 2009. Diabierna siman pasa Conseho di Minister a aproba presupuesto 2013, caminda Gobierno di Aruba a sa di mantene su mes dentro di e cuadro financiero. Hunto cu e partnernan di Dialogo Social a sa di yega na acuerdonan pa reduci gasto, como tambe aumenta entrada di Pais Aruba. “Pa 2013 ta calcula un crecemento economico di 3.5% mirando e desaroyonan positivo continuo den turismo y tambe ehecucion di proyectonan”, Minister de Meza ta sigui. E plan di estimulo economico cu e fin di mehora poder di compra y tambe pa recupera economia a contene inversionnan amplio riba tereno di infrastructura, urbanisacion y tambe energia alternativo. E plan ta encera un total di 1.2 biyon di florin na proyecto cu lo wordo ehecuta pa Gobierno, sector priva y tambe den cooperacion publico-priva.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter