Thursday, 24 July 2014
Dr. Horacio E. Oduber Hospitaal y Koningin Wilhelmina Fonds ta uni pa duna workshops tocante cuido y guia na esnan cu cancer Print E-mail
Tuesday, 05 March 2013 19:19

1

Poniendo e pashent di cancer, su emocionnan y sentimentonan central, Dr. Horacio Oduber Hospital a uni cu Koningin Wilhelmina Fonds, pa ofrece un siman di tayer importante y completamente gratis pa profesionalnan medico, incluyendo dokter, enfermeranan y specialistanan, como tambe trahado social y tur persona cu na un of otro manera ta duna cuido y guia na esnan cu cancer.

E orador principal ta e psicologo clinico specialisa den oncologia, dr. Carla Sno, kende ta un Arubiano bibando y trahando pa 40 aña na Italia. Sra. Sno ta duna e tipo di tayernan aki tur parti mundo y ta conduciendo e tayernan na Aruba na Papiamento. Director medico di Hospital, dr. Jaime Falconi a splica cu e departamento di oncologia di Dr. Horacio E. Oduber Hospital ta pasando den un desaroyo hopi grandi. Cu e aumento considerabel di pashentnan di cancer na Aruba, Hospital kier enfoca no solamente riba e tratamento medico, pero tambe e tratamento humano, dr. Falconi a bisa. El a añadi cu e oferta di parti di sra. Lilian Prins di Koningin Wilhelmina Fonds (KWF), kende a puntra cu kico e instancia aki por yuda Hospital cun'e, a bin na e momento husto. E pregunta mas esencial segun dr. Falconi ta: "Con nos por mehora e servicio cu e pashent y su famia mester pa nan ricibi e miho servicio y tratamento posibel?" Dr. Falconi y Sra. Prins a expresa cu nan ta contento cu Sra. Sno a acepta e invitacion pa duna e tayernan na Aruba y su experticio y conocemento ta un contribucion valioso na e cuido y guia di pashentnan di cancer. Carla Sno ta subraya cu ta hopi importante pa siña con pa trece un noticia impactante den un manera delicado cu hopi humanidad, pasobra esaki ta e prome encuentro y impacto cu e malesa tin riba e pashent. Con e pashent ta wordo trata y ta wordo teni al tanto di su situacion delicado ta yuda den su proceso di tratamento, pa e no bira negativo, el a comenta. Sra. Sno a splica cu e profesional medico mester tene cuenta cu e caracter di e pashent y su tempo di reaccion y semper mester pensa cu "bo dilanti tin un persona cu ta sufri y cu tin cu ricibi un mensahe delicado, pone hopi simpatia y pensa riba otro persona, si abo lo tabata na su luga." Sra. Sno ta subraya cu e ser keri di e pashent kende ta bon informa, kende sa locual ta pasando y kico e persona ta pasa aden, tin menos miedo y ta mas dispuesto pa drenta den e dolor di e otro persona, pa yud'e y pa confronta e situacion cu menos miedo. Relaciona na e rol di famia y amigonan, Lilian Prins a duna un conseho, cual ta pa no laga e pashent bay doctor su so y cu ta sumamente importante pa un hende yud'e asimila y organisa e informacion cu e ta ricibi di su specialista. E tayernan ta sigui diaranson, diahuebs y diabierna den e sala di conferencia di Dr. Horacio E. Oduber Hospitaal cu entre otro informacion y training con pa identifica y trata cu depresion, e proceso pa yega na un bida normal bek, recaida y sesionnan specificamente pa doctor di cas y specialistanan. E sesionnan pa doctor y specialista ta inclui entre otro comunicacion no verbal, capacidad pa scucha, simpatia, emocion di e pashent, y mas. Pa mas informacion y pa inscribi por manda un email pa kwf@setarnet.aw Hunta di Directiva di Hospital y Koningin Wilhelmina Fonds ta invita tur esnan cu na un of otro manera ta duna cuido y guia na esnan cu cancer pa atende e tayernan unico aki.

gallery1 gallery1 gallery1
gallery1 gallery1 gallery1

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter