Monday, 22 September 2014
Pos Chikito satisfecho cu trabounan di Gabinete Mike Eman Print E-mail
Tuesday, 05 March 2013 15:31

pch

Ora bo ta cana den bario bo ta topa cu diferente hende; chikito y grandi, Arubiano y residencia, di cas y empleado y asina por sigui. Tur ta ricibi Prome Minister Mike Eman durante su bishitanan di Accion di Bario cu hopi entusiasmo y emocion, incluyendo e amanan di cas. Den su paseo den Pos Chikito, e mandatario a yega tambe na cas di Maria y Adela.

Dos hende muhe cu ta lucha pa hiba nan famia dilanti, cu ta stima nan bario y ta hopi contento di por a ricibi Prome Minister Eman den  nan cas pa combersa riba kico mas por wordo haci pa e comunidad.

Maria ya caba den pasado tabatin oportunidad di conoce y papia cu Prome Minister Mike Eman y tampoco ta prome biaha cu el a ricibi’e na su cas. Ta hustamente e hecho ey ta loke a hala mas atencion di e señora pasobra ta poco hende por bisa cu un Prome Minister di nan pais ta bishita nan hogar na varios ocasion. “Cada biaha cu e bin mi cas, mi portanan ta hancho habri p’e.” Sra. Maria a bisa indicando cu e no tin nada contra ningun político of partido, pero cu esey ta pa Mike Eman so e por bisa.

“Ta prome biaha na mundo cu un Prome Minister ta bishita bo na bo cas diferente biaha den aña; na cualkier ocasion,” Maria añadi. “Eynan bo ta wak kico ta humildad. E ta un hende humilde, preocupa pa su pueblo.”

E señora ta masha contento di e trabou cu Gabinete Mke Eman a bin ta haciendo durante ultimo añanan. "Nos ta papia aki di echonan, cos cu bo por wak cu bo wowo,” Maria a comenta. Mas aleu el a conta con den su momento di mas critico y mas preta, el a haya oido, atencion y ayudo di Prome Minister. “E ta papia cu bo den bo cara. E no ta papia cu bo y baha su cabes abou. Bo ta ripara cu ora bo cuminsa conte bo problema, e homber su wowo ta yena cu awa,” Sra. Maria ta corda cu hopi emocion. “Ey bo ta ripara cu e ta un homber cu en berdad tin su pueblo na pecho.” Sra. Maria a culmina su testimonio bisando cu “Ojala tur otronan por ta mescos cu nos Minister President.”

Otro bisiña di e bario ta sra. Adela Ross. E tin mas cu 21 aña bibando den Pos Chikito y ta bisa den bos halto cu e ta stima su bario pasobra e ta uno trankil. Prome Minister Mike Eman a pasa na su cas y wak con e tabata den pleno preparacion di Johnny Cake cu bacalao cu e sa traha riba pedido. Mientras cu sra. Adela a sigui cu su trabou, apesar di e emocion grandi di por tin e Minister den su cas y den su cushina, el a combersa cu e mandatarionan riba e situacion di e bisindario.

Prome Minister semper ta masha atento di e opinion di e habitantenan paso no tin miho persona pa splica kico ta bon y kico mester bay traha riba dje cu no ta propio habitantenan. Sra. Ross a conta Prome Minister cu e ta desea di por wak cu Gobierno ta traha un parke caminda e muchanan por hunga trankil. Aworaki e muchanan ta hunga riba caya y como mama, e sa cu esey ta un preocupacion constante. Premier Eman a sigura cu su sugerencia lo haya su debido atencion y lo keda discuti den e Ministerio concerni pa wak e posibilidadnan pa wordo hinca esaki den e plan di mehoracion di Aruba den su totalidad.

Fuera di esey, sra. Ross a comenta cu e ta satisfecho cu e trabou di Gabinete Mike Eman pasobra “en berdad bo ta wak cu nan ta haciendo algo bon.” Algun ehempel cu el a duna ta e construccion y reparacion di camindanan, como tambe tur loke a wordo haci na San Nicolas. E ta sinti cu Aruba ta pasando den un periodo sumamente interesante y positivo.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter