Sunday, 23 November 2014
Premier Eman: Presupuesto entrega ta muestra di trabou consistente, serio y responsabel Print E-mail
Monday, 04 March 2013 21:06
Comparti

mike presupuesto

Prome Minister Mike Eman ta satisfecho cu presupuesto 2013. Satisfecho pa varios motibo. Un di nan sigur ta e hecho cu e deficit ta 185 miyon menos cu e prome presupuesto cu su gobierno a haya na momento cu nan a drenta gobernacion. “E logro aki ta a base di un trabou consistente, un trabou serio y responsabel cu a bin ta haciendo desde 2009 te awor”.

Eman a splica tambe cu e presupuesto entrega ta yegando e normanan internacional, mientras cu den mundo tin un cantidad di pais cu ta luchando pa por haya gara riba nan desaroyo financiero y tambe pa haya e gara riba e trayecto di un desaroyo economico sostenibel y positivo. Di dos indicador cu ta encera un trabou sumamente grandi ta e economia di pais Aruba. Cu cifranan concreto cu por wordo haya tambe na Banco Central, Prome Minister a mustra riba e situacion economico pesimo na momento cu su gobierno a asumi su responsabilidad. E gobierno cu a caba di sinta a bin haya un crecemento economico di -9% (min nuebe por ciento)!! “Paisnan cu tin un crecemento di min 2 of min 3% ta papia di crisis y calamidad y nos a bin haya min 9% como crecemento economico di pais Aruba. Awe, despues di solamente tres aña di gobernacion e indicacion ta cu e crecemento ta bay ta di 5%”. E diferencia ta di 14%. Esaki ta e indicador di un trabou di transformacion cu a wordo haci durante e ultimo añanan. Eman a bisa cu e pregunta cu tur pais na mundo ta haci nan mes ta ‘con baha un deficit sin crea un situacion di crisis social den nan pais’. “Tanto na Aruba como den otro paisnan na mundo por mira cu sin busca e ekilibrio entre e caminda di un desaroyo responsabel den finanzas publico y un desaroyo responsabel socio economico, paisnan ta tuma medidanan hopi extremo. Esaki ta sea den un solo direccion pa stimula e economia y ta crea deficitnan ainda mas grandi cu nan tabatin caba. Otro paisnan ta corta severamente en busca di e balansa den nan finanzas publico, strangulando di e forma aki nan economia”. Eman a splica den detaye con Aruba a scoge pa cana un caminda meymey. “Na mes momento cu no a bay ta reduciendo e deficit, nos a aloca cada cen cu nos tabatin pa duna un inyeccion na e desaroyo social economico di nos pais. Asina nos a crea e synergia pa e motor por sigui draai y pa haya entrada pa por sigui paga loke ta bo responsabilidadnan. Pasobra si bo corta te na unda bo ta mata bo economia y bo a mata e poder di compra di bo ciudadanonan bo no ta bay tin entrada tampoco pa den futuro por cumpli cu bo responsabilidadnan”. Prome Minister Eman a bisa cu den tur humildez e ta bisa cu e caminda cu su gobierno a cana tabata esun corecto y cu ora analistanan internacional manera Fitch Ratings y Standard & Poor’s bin bishita Aruba cu e tin e confiansa cu nan lo apunta cu locual Aruba a haci ta sin duda ta algo remarcabel. “Esaki pasobra e pais a sa di haya e ekilibrio entre reduci su deficit y na mes momento duna un empuhe na su economia te cu esaki a cuminsa crece poco poco bek. E di cuatro indicador ta e reduccion di desempleo cu tabata riba 10% pa 7% y awor ta na 6%. Un transformacion di nos situacion financiero publico y un transformacion di e situacion social economico den nos pais. Na unda nos a mira cu tabatin un perdida di poder di compra nos a keda alimenta esaki pa e hendenan por a surpasa e perdida grandi di poder di compra cu tabatin dor di tur e medidanan tuma dor di e gobernacion anterior”. Prome Minister Eman a felicita su colega Minister di Finanzas Mike de Meza pa e tremendo trabou cu e y su staf a bin ta haci. Tambe e tabatin palabra di felicitacion pa e Minister di Economia y demas ministernan di su Gabinete. “Aruba ta riba e bon caminda”.

Comparti
Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter