Aruba Lions Club a celebra 65 aña di existencia

Monday, 04 March 2013 17:58

Recientemente Aruba Lions Club a celebra su di 65 aña di existencia. Den cuadro di esaki un bishita di cortesia a ser haci cerca di Gobernador di Aruba. Durante di esaki a intercambia cu Gobernador riba diferente topico cu ta regarda e club aki pa e proximo añanan. Tambe a otorga Gobernador e prome pin conmemorativo di 65 aña como un miembro honorario.

Aruba Lions Club a ser representa pa e presidente LN Randolf Vrolijk, e secretario LN Jaime Lacle y e chairman di e comite di celebracion di 65 aña LN Orlando Quandt.

Den cuadro di e aniversario aki tambe a tuma luga un cena ameno durante cual diferente serviceclub di Aruba tabata presente. Durante di e anochi aki diferente miembro di e club a ser honra pa nan añanan di miembresia, nan contribucion y nan aporte na e Aruba Lions Club y na e comunidad Arubiano.

E anochi a culmina ora a honra 3 conciudadano e famoso “Melvin Jones Award”, cual ta e reconocemento mas prestigioso cu un miembro di Lions Club Internacional of un otro persona den comunidad cu a destaca por ricibi. E reconocemento aki a ser nombra na su fundado Melvin Jones, kende a funda “Lions Club International” na aña 1917 na Chicago na Merca.

Durante e anochi aki señor Hubert Lio Booi a ricibi su reconocemento Melvin Jones pa su dedicacion y su contribucion na historia, cultura, musica di Aruba y como co-autor di nos himno nacional Aruba Dushi tera. E ta un bon ehempel di un ciudadano cu a contribui hopi na forma y desaroya nos comunidad.

E segundo persona cu tambe a ricibi su reconocemento Melvin Jones ta zuster Graciela Kock pa su dedicacion y su contribucion na educacion y formacion di nos muchanan y na su vocacion como religioso. E tambe ta un bon ehempel di un ciudadano cu a contribui hopi na forma y desaroya nos comunidad.

E ultimo persona cu a ricibi su reconocemento Melvin Jones durante e anochi aki ta Lion Francis Leo pa su dedicacion y contribucion excepcional durante periodo como miembro di Aruba Lions Club. Señor Leo ta un bon ehempel di un miembro cu ta contribuyendo hopi na forma y desaroya e organisacion.

E miembronan cu tambe a ricibi nan reconocemento ta LN Ebby Arends, LN Randall Croes, LN Kenneth Luidens, LN Urbano Maduro, LN Ronny Nicolaas y LN George Simon.

E Presidente LN Randolf Vrolijk, acompaña pa e secretario LN Jaime Lacle, a entrega e reconocementonan den presencia di e demas “service clubs” y tambe di e Lions Zone chairman señor Clifton Walle, representantenan di Bonaire Lions Club, Curaçao Lions Club y Aruba Lions Club.