Friday, 31 October 2014
Aruba ta honra 3 baluarte cu un busto dilanti oficina di UNOCA Print E-mail
Monday, 04 March 2013 15:33
DSC_2063
Luna di maart ta uno sumamente special pa henter e pueblo di Aruba, ya cu ta dedica e luna completo na tur e celebracionnan y e eventonan cultural cu ta relaciona cu nos pais. Pa duna inicio oficial na e luna di celebracion aki, diabierna ultimo, UNOCA a haci e acto oficial di desvelo di e monumentonan di 3 baluarte Arubiano, ta trata di e bustonan di Padu Lampe, Hubert ‘Lio’ Booi y Rufo Wever (q.e.p.d.).

Minister di Asuntonan Economico, Asuntonan Social y Cultural, Michelle Hooiboer-Winklaar, tabata presente na e acto oficial aki y a keda hopi satisfecho y contento cu e iniciativa di UNOCA aki y ta sigui apoya tur iniciativa cu ta contribui na e gran celebracion di nos luna cultural. 

Nilda Koolman di UNOCA a hiba palabra y a splica e motibo tras di e iniciativa aki na tur presente. “Nos ta duna inicio di e luna cultural, popularmente conoci como nos luna di Himno y Bandera, cu presentacion di monumento di 3 baluarte cu a cubri varios tereno cultural, sea como musico, pintor, autor, poeta, etc. Un monumento pa honra 2 di 3 compositornan di nos dushi himno, cu ainda ta activo riba e tereno cultural. E monumento aki no ta solamente pa brinda homenahe na e 3 baluartenan aki, pero tambe ta un forma pa documenta un parti di nos herencia cultural, specialmente pa e generacion hoben y esunnan den futuro, p’asina nan tambe conoce nos baluartenan y traspasa e historia di un genero pa otro. Esey ta loke UNOCA kier contribui na dje”.

E obra maestral aki ta un creacion di Maritza Erasmus y e pedestal ta crea pa un otro artista y realisa pa Dadu Croes y Martin Bermudez. UNOCA a opta pa haci e bunita obra aki riba un baranca cu ta movibel, pasobra tin entendi cu tin un plan den futuro pa traha un plasa cultural pa honra e 3 baluartenan aki y UNOCA sigur lo brinda tur sosten pa ehecuta e plan valioso aki. Nilda Koolman a haci un bunita referencia di e palabra ‘cordialidad’, cu ta bin den e di 3 couplet di nos dushi himno. El a cita un parti di e buki di Hubert Booi, unda cu e ta uza e palabra ‘cordialidad’ y ta pone un nificacion mas profundo di esaki. Segun e cita di Hubert Booi, e ta referi cu nos no mester ta solamente ‘cordial’ cu nos turistanan, pero cu nos mesun hendenan tambe. Nos tin cu ofrece cordialidad na tur momento di dia, demostrando nos aprecio, ayudo pa otro y respet, specialmente den e temponan actual, unda cu tecnologia ta domina y cu e contacto personal a bay hopi perdi. Ta un bon momento pa duna mas contenido na e palabra ‘cordialidad’, cuminsando specialmente den e luna proclama como luna cultural.

Maritza Erasmus a elabora hopi corto riba su trayectorio di crea e bustonan aki y a indica cu el a encontra varios reto na caminda, specialmente cu e busto di Rufo Wever, cu ta un persona cu e no conoce y ta a base di diferente potret el a crea e monumento aki. Su experiencia tabata algo unico, ya cu el a haya e tarea aki uno hopi special y bunita pa haci.

E concepto tras di e pedestal, pues e baranca cu e tres baluartenan aki, ta pa trece tur e elementonan di nos pueblo, cu ta den nos dushi himno, den un forma visual dilanti. Un creacion cu diferente tipo di piedra pa refleha e diferente luganan di Aruba y hunto ta crea un pueblo.

“Nos ta dedica atencion na nos pais, na e simbolonan cu ta identifica nos dushi pais y si antes Aruba por a celebra su Dia Nacional riba un dia so, awendia nos ta realisa cu esey ya no ta e caso mas, pasobra nos tin hopi motibo pa celebra y p’esey nos a proclama e luna di maart, como nos luna nacional. Nos a duna honor na 3 baluarte y sigur nan tin gran importancia den nos historia di cultura y mi kier duna UNOCA un caluroso pabien pa e bunita iniciativa aki. Na tur esunnan cu a traha riba e pida arte aki, un pabien, paso boso ta engrandece nos cultura y ta percura pa nos historia keda bibo pa hopi tempo mas. Probechando e momento aki, mi kier comparti un noticia nobo cu boso, cu otro siman nos ta trata un ley pa ahusta esaki y ta agrega e shoco como simbolo nacional di nos pais. E luna di maart ta definitivamente yen, cu diferente actividad cultural tanto pa grandi como chikito y p’esey desde awe,  mi ta encurasha tur hende pa participa mas tanto cu ta posibel na e eventonan cultural den luna di maart, nos luna cultural, ya cu e ta importante pa cada un di nos ta aporta na esaki y nos ta refleha e celebracion aki”, asina Minister Michelle Hooyboer-Winklaar a termina su discurso dilanti oficina di UNOCA.

dowers dowers dowers
dowers dowers dowers
dowers dowers dowers

Comentarionan (1)Add Comment
e berdad prome
March 04, 2013
201.229.2.59
Votes: -1
...

Padu ta berde berde

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter