Wednesday, 23 April 2014
Clyde Harms Tenis, esgrima y basketball na Guatemala na 1949 Print E-mail
Thursday, 14 February 2013 08:14
DSC_2063
Na 1949 un grupo di deportista di Aruba y Corsou a bay Guatemala pa compiti den basketball, tenis y esgrima. Danki na mi dushi sobrina Marla, recientemente mi a descubri un potret den un caha yen di potret cu su tata, mi difunto ruman “Hato”, a laga atras.

E potret a wordo saca e anochi prome cu nos a bolbe Aruba, na Restaurant Maya, e restaurant mas famoso di Guatemala, pasobra e tabata sirbi masha bon cuminda y e waitresnan tabata cana pia abou.

E vuelo di Aruba pa Guatemala tabata cu e mes DC3 cu a trece e seleccion di fubol Guatemalteco pa hunga na Corsou y Aruba. Pa evita di bula hopi ora over di tera cu ceronan haltu, e vuelo a bay via Kingston, Jamaica. Aya nos mester a spera casi dos ora pasobra tabatin un mal tempo den nos trayectoria. Ora cu nos a yega e montañanan di America Central, e avion chikito di apenas 21 pasahero a cuminsa sacudi masha hopi y de bes en cuando e tabata cay algun meter prome cu e pilot por a sac’e di e caida. Dos di e pasaheronan a vomita. Mi ta corda cu ami tambe a cuminsa haya gana di saca, pero mi a logra wanta mi stoma te ora nos a yega aeropuerto di Guatemala City. Eynan mi a core busca e prome baño cu mi por a drenta.

Cu ayudo di Michael Kuiperi kende tambe tabata den e grupo, mi a identifica e deportistanan, Como nos no por a identifica ningun di e grupo anfitrion Guatemalteco, mi a pone (G) lugar di nan nomber. Un * ta identifica e de portistanan di Corsou.

Dilanti, di RpD.: Nico de Cuba, Leo Kuiperi, Nico Hilhorst, (G), “Tali” Perret-Gentil*, (G). Meymey, diRpD, Isaias Samuel “Iyo” Pimentel*, (G), (G), Sra. Wenink*, J. Boutmy Sr*., Sra Noordhoek Hecht*, (G), Jan Adolf Boutmy*, Ramon Pimentel*, Harold “Hato” Harms. Patras, di RpD, Michael Kuiperi, (G). (G), “Dolfi” Oduber; casi no visibel pa via di e refleccion di e bentana di glas ta Herman Kuiperi y Clyde Harms, (G), Eithel de Haseth*, (G), Janchie Schotborgh*, Eddie Laclé, (G).

E tenistanan a haci un bon papel, ganando casi tur nan weganan. Especialmente e hoben Iyo (apenas 16 aña), cu forehand y backhand manera di un veterano, tabata impresionante. Increibelmente, hungando den e solo cayente di Guatemala, Iyo no tabata soda dos drop den henter un match! E damanan tenista Hulandes di Club Asiento tambe a saca cara pa Corsou. Tur e esgrimistanan tabata bon prepara, pero atrobe tabata un hoben, Jan Boutmy (19), cu a hala atencion di e Guatemalteconan. Iyo Pimentel despues a bira campeon di Corsou y di Venezuela, y Jan Adolf Boutmy a bira campeon di Corsou y Antiyas y a gana hopi competencia internacional. No ta un sorpresa cu Jan Boutmy y Iyo Pimentel eventualmente a drenta Sports Hall of Fame di Corsou.

Desafortunadamente, net den basketball, e sport den cual ami a participa, y mi ruman “Hato” a dirigi, nos no a haci un bon papel. Por cierto, nos a perde tur cinco wega y tur cu diferencia basta grandi. Pero esaki tabata di spera. Nos no tabata den basketball “season”, nos seleccion apenas a practica dos bes na Aruba (sin e hungadornan di Corsou) prome cu nos a biaha, nos no tabata den bon condicion y e altura di Guatemala a afecta nos fisicamente. Remarcabel ta cu ningun corant na Corsou ni Aruba a raporta algo di e competencianan na Guatemala: nada di basketball, nada di tennis y nada di schermen. Considerando e actuacion malo di nos team di basket, e omision aki tabata un bendicion. Adhunto un potret di e ekipo di basketball.

Un dia un grupo di e Arubianonan a topa cu “Toti” Arends, e gran pianista/compositor Arubiano cu tabata biba cu su famia na Guatemala. El a hiba nos su cas caminda nos a rek un paranda chikito cu “Toti” na piano y nos tur tumando tequila local y cantando canticanan di Aruba; mayoria di nan, canticanan romantico, pero algun di nan canticanan di paranda di berdad. Ta e dia ey mi a siña come bonchi preto (frijoles negros) cu aroz cu mi a gusta hopi

Nos anfitrionnan Guatemalteco tabata magnifico. Nan a organiza tournan pa diferente lugar turistico di Guatemala. Asina nos a conoce Lago de Atitlan y Lago de Amatitlan, e pueblo Chichicastenango y varios mas. Nan a hospeda nos den Hotel Victoria, e tempo ey e miho hotel di Guatemala City. E camareranan aya tabata notabelmente bunita, un mezcla di rasa indjan cu blanco. Nan tabata di e pueblo Cobán caminda un tempo hopi Aleman a establece y mezcla cu e Indigenonan.

Prome cu tur nos weganan di basketball tabatin un wega di mucha muhernan di colegio y normalmente e galiñanan tabata keda pa wak nos hunga. Aunke nos tabata perde, o tal bes, pasobra nos tabata perde tur wega, nos a bira hopi popular cu nan. Un anochi na cena a bin un yamada pa number cinco di Aruba. Ami! Tabata e basketballista escolar cu tambe tabata usa number cinco y e kier a invita mi pa un fiesta na su cas e anochi ey. Un poco cauteloso, mi a puntra si mi por bin cu un amigo. E contesta tabata positivo y mi a pidi Herman Kuiperi pa compaña mi. A resulta cu no tabatin ningun fiesta, pero number cinco y su amiga a haci e anochi ey inolvidabel pa Herman y ami. Mainta ora nos ayega bek na hotel tur nos compañenan tabata kier sa con a bay cu e fiesta, pero esaki a keda un secreto. Despues nos amiganan a trece un otro amiga kende kier a conoce “el guapo director técnico”, mi ruman Hato y varios biaha nos tabata topa. Riba e potret adhunto cu mi a saca den un park ta aparece Hato cu su amiga y e number 5 kende a haci e encuentronan posibel. E encuentronan aki a kita hopi di nos pena di a perde tur nos weganan na Guatemala na 1949.

Manda bo comentarionan pa clydeharms@yahoo.com.

dowers   

Comentarionan (1)Add Comment
Tyrone Wong
February 14, 2013
24.19.33.39
Votes: +1
...

Clyde,
Mi ta korda e basketballista nan bon como miembro di Caribe y Tivoli club, cual nos team di San Nicolaas tabata den competición. Bo artíc*lo ta trece bon memoria di Aruba y nos hubentud. Dios te bendiga pa "sharing"
Ty

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter