Aeropuerto di Aruba ta gana prome premio pa excelencia den Airline Marketing

Wednesday, 13 February 2013 16:22

Aruba Airport Authority N.V. (AAA) ta hopi orguyoso pa anuncia su premio mas recien: Ganador di Routes Airport Marketing Award 2013 den e categoria bou di 4 miyon pasahero di America!

AAA a wordo nomina mas trempan hunto cu Lynden Pindling International Airport (Nassau) cu a ricibi e premio Highly Commended, Alejandro Velasco Astete International Airport (Cuzco), Hewanorra International Airport (St Lucia) y Owen Roberts International Airport (Grand Cayman).

E award ta bin aserca di e “Highly Commended” y status di runner-up di e World Routes Awards ricibi na Abu Dhabi na 2012. Esaki ta di dos biaha cu AAA a resulta como ganador di e award prestigioso aki, como cu na 2010 tambe AAA a ricibi e award pa “Excelencia den Airline Marketing di Routes’ Americas Conference na Lima, Peru den e categoria Centro America y Caribe.

E “Routes Awards” anual ta hopi importante y ta wordo considera como e award mas valioso den e industria door cu esnan cu ta vota y huzga ta e comunidad di “airline network planning”. Nan ta brinda e comunidad di aerolineanan cu e oportunidad pa expresa nan mes riba cua aeropuerto den nan opinion ta brinda e mihor servicio di airline marketing general na nan, sea e ta tocante nan relashon en particular, resultadonan efectivo, provision di data y informacion of tecnicanan inovativo pa establese rutanan nobo of mantene y desaroya rutanan existente.

“Nos no kier zona arogante, pero nos tabata hopi sigur di nos esfuersonan den airline marketing di anja pasa y tabatin e presentimento cu e anja aki e premio lo ta pa nos! E ta un exito fantastico pa nos team di mercadeo y e ta mustra e aprecio di e aerolineanan pa nos asercamento proactivo consistente na nos partnernan di industria principal. E nominacionnan y awardnan ta importante pa nos por monitoria con nos ta para compara cu e competencia, mirando cu tur aeropuerto ta haci todo lo posibel pa conkista e industria di aerolineanan. E award aki ta un bon manera pa nos por tin un reconocimento cu credibilidad cu nos por orguyosamente comparti cu nos clientenan y otro stakeholders,” asina Peter Steinmetz, CEO di AAA a bisa.

Den e potret por aprecia e Head Airline Marketing Jo-Anne Arends hunto cu Business Unit Manager Terminal Barbara Brown cu orguyosamente ta mustra e award ricibi na Cartagena, Colombia dialuna ultimo.