Saturday, 22 November 2014
Minister Otmar Oduber a gradici tur e partnernan cu ta haci e logronan aki posibel, Januari a cera cu un crecemento di 10% den turismo Print E-mail
Tuesday, 12 February 2013 17:53
Comparti

 otmar

Diamars mainta durante conferencia di prensa di Gobierno, hopi noticianan positivo a bin dilanti pa loke ta trata nos turismo. Promer Minister, Mike Eman, hunto cu Minister di Turismo, Transporte y Labor, Otmar Oduber, directora di ATA SG, Ronella Tjin Asjoe-Croes y director di aeropuerto, Peter Steinmetz a presenta e resultadonan positivo pa loke ta trata crecemento den turismo durante januari 2013.

Premier Eman tabatin palabranan di elogio pa loke ta e trabou di su colega Otmar Oduber como tambe pa ATA y aeropuerto. El a gradicinan pa e trabounan realiza cu awe por mira cifranan di aumento di 10% den turismo stay over, 26% den turismo crucero y un grado di ocupacion na e hotelnan di 83%.

Minister Oduber di su banda a comenta cu e cifranan aki ta sigui e desaroyo positivo pa loke ta aña pasa caminda a conoce un crecemento di 4.1%.  E resultadonan positivo aki no ta algo cu a sosode di casualidad, “e ta un vision cu a wordo poni pa dilanti, e ta un maneho cu nos no a papia ora a drenta Gobierno na 2009, pero a papia riba dje hopi antes for di oposicion ora nos tabata mira con e desaroyo den turismo tabata e tempo ey y con partido AVP tabata envisiona turismo pa Aruba pa e proximo 10 pa 15 aña”.

Continuando, Minister di Turismo a bisa cu e curashi y determinacion cu tabatin di Promer Minister y Minister Mike de Meza pa tuma un decision cu pa mas di 20 aña no a wordo tuma, esta pa sostene e independizacion di ATA y percura pa nan haya nan fondonan ‘earmarked’. E team cu tin awe na ATA, a responde tambe na e curashi cu tabatin di parti Gobierno y awe por mira e cifranan creciente pa loke ta trata nos turismo. Probechando e ocasion, el a felicita tur esnan laborando na ATA tanto na Aruba como den exterior pa e exito cu nos conoce awe den nos turismo.

Mustrando riba e importancia di cifranan den sector di Turismo, Minister Otmar Oduber a indica cu pa maneha turismo mester tin cifranan, cu mester por analiza, studia y tin un database pa por midi unda ta saca placa, unda ta hinca mas placa y unda ta inverti pa por haya e mihor entrada for di dje. ATA, despues di hopi aña, a haci uso di e base aki, cual no tabata wordo usa, pa por haya y maneha e tipo di cifranan aki na un forma hopi mas responsabel pa por midi unda ta inverti e placa pa por haya mas entrada for di dje.

Un partner strategico den e exito den nos turismo cu a wordo menciona pa Minister Oduber ta nos aeropuerto, cu a pasa di ta solamente un aeropuerto comercial, pa uno cu ta servicial tambe:

Hunto cu tur e inversionnan positivo, tur e cosnan bon cu aeropuerto tabatin, percura pa inverti den e ambiente, laga e turista sinti cu na e momento cu e baha for di avion, cu el a yega na un destinacion cu no ta comparabel cu otro destinacionnan.

Asina, e inversionnan cu a wordo haci den ultimo añanan, no solamente den infrastructura, pero tambe di embeyecimento di aeropuerto, dune e calor Arubiano, cu e musica cu ta toca, cu e ambiente cu a wordo crea tanto paden como pafor di aeropuerto, a contribui na e exito cu nos ta mira awe den nos turismo.

Igualmente e mandatario di Turismo a gracidi e hotelnan pa nan contribucion, cu a confia den e vision y maneho di Gobierno di no crece mucho den cantidad pero mas bien den calidad. Di e forma aki nan a inverti miyones di dollar den ultimo 2 aña den nan propiedad, pa pone nan producto na e nivel cu Gobierno a pone pa Aruba. Esaki a conduci tambe na e cifranan di Banco Central, caminda den e promer 3 kwartal di 2012 por mira un crecemento di riba 3% pa loke ta trata e placa cu turista ta laga atras den economia.

Minister Otmar Oduber a finaliza bisando cu e resultadonan di turismo ta exitoso, pero esey no kiermen cu trabou ta cla, e trabou ta bay bira uno intensivo den e simannan y lunanan nos dilanti.

Comparti
Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter