| Mi compromiso cu Aruba ta e cosnan chikito cu nos por haci pa mantene e servicio di Aruba consistente y na un nivel halto |
 |
 |
| Tuesday, 12 February 2013 16:13 | |||
 Cada un di nos tin un compromiso cu Aruba, principalmente cu nos turismo, pero sigur den e diferente area unda nos cada uno ta activo. Manera ya ta conoci, Aruba Tourism Authority (ATA) desde september 2012 ta duna un bista den e bida di algun individuo trahando riba diferente tereno den nos comunidad, tur esaki pa ilustra compromiso di diferente conciudadanonan pa cu nos pais y nos turismo.
Monique Zaandam ta un di e ganadornan di Shoco Awards 2012. E ta ‘Assistant Director of Human Resources’ na Westin Resort y a gana e premio di ‘Excellence for Manager of the Year 2012’. Monique ta destaca den su compromiso cu Aruba y ta comparti su experiencia. E ta un persona cu un trayectoria basta amplio den e mundo di turismo. E tin casi 20 aña trahando den e industria aki y el cuminza na Westin den e departamento di Guest Activities. Cinco aña despues el a sigui un training pa despues drenta den e departamento di Recursonan Humano unda e ta actualmente. Monique ta un persona cu ta destaca pa su caracter trankil, su pasenshi y pa ta un persona hopi keri cerca e trahadornan di Westin. E ta hopi contento cu loke e ta haciendo. Su trabao no ta algo rutinario ya cu e ta encera hopi union y pone hopi atencion riba loke ta e cliente interno cu ta e empleadonan, el a bisa. “Hopi di mi tempo ta bay na planea y structura e trainingnan pa e empleadonan, esaki tambe ta encera trainingnan manera les di idioma, di computer of kico e empleado mes kier of mester pa su desaroyo”, el a expresa. Ademas di esaki Monique ta coordina tur loke tin di haber cu e stagiarenan y wak e mihor opcionnan pa e departamentonan. Monique Zaandam a laga sa cu algo cu e ta disfruta hopi ta e desaroyo di diferente empleado y di stagiairenan. “Por ehempel, un persona cu a cuminsa como waiter y e kier bira bartender of supervisor, anto pa wak con e por logra esey y con nos por yuda cu su progreso. Ademas di esey, ta bunita pa wak tambe con –durante e temporada di stage- e stagiairenan cu ta bin di EPI ta echt siñando. Nan ta haya mas confiansa y despues nan ta haya un cargo cu mas responsabilidad. Esey ta e parti mas dushi”. “Ta hopi importante pa reconoce e bon trabao di e empleadonan y duna nan elogio pa esey”, e ta remarca. E experiencia cu e huespednan tambe ta un aspecto cu tin masha importancia den su trabao. El a conta cu durante cu e tawata traha cu e huespednan e tawata hopi grato pa wak con e huespednan a bin front desk pa puntra p’e. “Maske nan no tawata wak mi, nan a percura pa nos topa un rato. Mi tawata laga nan sa, cu mi ta care pa nan y cu mi ta hay’e valioso cu nan ta haci esfuerzo pa yama mi”, el a manifesta. “Un di e lesnan cu mi a siña trahando den turismo ta cu tur dia nos ta siña algo nobo. Nos ta comparti experiencianan y intercambia ideanan. Ta bunita cu tur dia mi ta siña algo y esey mi ta mir’e como algo hopi valioso”. Pa loke ta su experiencia cu Shoco Awards, el a bisa cu den Human Resources nan tin e tarea pa compila e informacion y manda esaki pa AHATA. E tin custumber di yuda forma e nominacion, pero e biaha aki e mes tawata un di e nominadonan. “Esey pa mi tawata hopi special pasobra semper mi a wanta e man di e empleado, pero e biaha aki mi mes a pasa den e trayectoria ey”, el a expresa.
Segun Monique Zaandam, e nominacion tawata algo special p’e ya cu normalmente el a yuda prepara y nomina, pero awor e mes tawata un nominado.”Pa gana, esey tawata algo cu mi no a spera ya cu tawatin candidatonan hopi fuerte den e categoria ey anto esaki a sorprende mi di berdad. El a bira algo inolvidabel!”. “Hopi mas emocionante tawata e dia despues ora cu henter e famia di Westin tawata felicit’e y mira esaki como un otro logro mas di e hotel, ya cu esaki ta e di dos Shoco cu Westin ta gana”, Monique a bisa. Como un hende cu tin un trabao importante pa haci, Monique Zaandam a laga sa cu su compromiso cu Aruba ta “...den e detayanan chikito cu nos por haci pa mantene Aruba su cordialidad. Pero e mesun cordialidad tey tambe pa mi coleganan cu mi ta traha cu nan como tambe e bishitantenan. Mi deseo ta pa nan sint’i e amabilidad di Aruba. Mi ta kere cu esey, nos tur por demostra nos compromiso cu Aruba”. “Mi focus ta riba yuda e empleadonan di Westin y e studiante di schoolnan local den e desaroyo di servicio pa nos turistanan, pero pa nos comunidad tambe. Nos ta gana nos turistanan pa nan regresa pa nos isla cu nos servicio consistente y na un nivel cu ta semper optimal”, Monique Zaandam a declara. Tocante Aruba Tourism Authority: Aruba Tourism Authority tin como meta pa ta un organisacion di mercadeo inovativo y efectivo cu ta posiciona e marca Aruba como e destinacion turistico di prome nivel, enfocando riba calidad di e experiencia y di turismo pa Aruba. Una bes aki na Aruba, un turista su experiencia ta depende di e infrastructura turistico y e interaccion cu nos hendenan. Sea cu e persona en cuestion ta traha den e industria turistico of den cualkier otro ramo, nos tur por tin un impacto positivo riba Aruba su turismo y bienestar di nos economia y di nos isla. Pa mas informacion subi e website: www.aruba.com of “like” nos riba facebook/oficinaditurismo". Explora Aruba su app.aruba.com
|
Mustra/Kita e formulario di comentario
