Friday, 24 October 2014
Departamento di Salud Publico di Aruba: Mas sugerencia pa preveni e malesa di Dengue Print E-mail
Tuesday, 12 February 2013 16:07
DSC_2063
Departamento di Salud Publico di Aruba (DESPA) kier sigui recorda comunidad di Aruba riba e importancia di mantene bo cura limpi pa asina evita criadero di e sangura cu ta transmiti e malesa di Dengue.

Na varios localidad na nos isla y pa medio di radio, corant y television por aprecia e mensahe di DESPA, cual ta “Sin criadero no tin sangura, sin sangura no tin dengue”. DESPA kier pone enfasis riba e echo cu mester ta alerta pa tur obheto cu por bira potencial criadero di e sangura cu ta transmiti e malesa di Dengue. Pa e motibo aki DESPA ta duna mas informacion tocante e malesa di Dengue, su efectonan, kico pa haci na momento cu hay’ele, pero mas importante con pa preveni esaki.

Dengue ta un malesa cu ta wordo transmiti pa e sangura Aedes aegypti y cu ta broei den awa limpi cu a keda para mas cu 2 dia. Nan ta biba mas cu 30 dia y e sangura hembra por pone 100 webo cada biaha. E webonan cu no kibra por keda bon pa un (1) aña sin awa. Esaki ta nifica cu asina cu un tiki awa cay riba e webonan , esaki ta desaroya y bira un sangura adulto Aedes aegypti y por transmiti e malesa di Dengue.

Cada persona por aporta pa evita criadero di Dengue. Un par di sugerencia ta: benta awa afo cu a keda para den e obhetonan cu ta den cura, laba esakinan bon cu habon y seca nan. Bolter y/of ruim op tur obheto den cura cu por bira un criadero di e sangura di Dengue. Paden den cas tambe por tin criadero. Cambia e awa di e vaas cu flor of steki di mata regularmente. Controla bou di frigidaire si tin awa para, haci esaki limpi. Si tin algun otro obheto cu awa den cas benta esaki afo y haciele bon limpi regularmente.

Por ultimo DESPA ta recorda comunidad di Aruba pa mas informacion por yama DESPA, Dienst Besmettelijke Ziekten na 5224200 y/of Gele Koorts Muskiet Bestrijding na 5853328 of 5855533.

Tambe por bishita www.dengue.aw cu ta yen di informacion tocante e malesa, sintomanan y hopi mas sugerencia pa prevencion.

Ban combati e malesa di Dengue. Sin criadero no tin sangura, sin sangura no tin dengue.

Comentarionan (1)Add Comment
sangura
February 12, 2013
201.229.82.225
Votes: +1
...

Lastima ta cu e pueblo aki No ta conciente cu nos tur hunto mester combati dengue pasobra si ami ta percura pa paden y pafor di mi cas ta liber di criadero y mi bisiñanan rond no ta hasi esaki nunca lo por ilimina criadero di dengue. Nos tur hunto mester pone man hunto pa logra esaki y corda cu Dengue ta un virus cu ta hasi hopi daño na salud di hende y por causa hasta morto.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter