|
Hortencia Rasmijn Werleman a haya su mes den un shock y un susto grandisimo ora cu miembronan di Team di Aresto a los tiro riba su auto, na momento cu tabata en busca di atracador, pero sin cu nan tabatin nada di haber cu e delito cu a wordo cometi. Sra. Hortencia Rasmijn Werleman den combersacion cu nos a splica, cu tur esaki a sosode despues cu el a presencia eleccion di Sra. Carnaval y e tabata rumbo pa su cas.
Riba caminda di Paradera, el a splica, el a mira un mucha homber hopi jong canando. El a dicidi di para puntrando e hoben, unda e ta bay pa mira si e ta bay dune lift. Despues di evalua, el a bisa subi. Hasta e mucha homber prome cu el a subi, el a mira si tin hende sinta patras den e auto, ya cu e glas ta cera. Despues cu e hoben a acepta e lift, nan a sigui direccion pa Sta Cruz. Pero sra. Hortencia a nota cu na altura di brug di Piedra Plat tin un auto preto cu tabata core hopi pega riba nan. Ningun momento, e ta bisa, el a pensa cu ta trata di Polis. E auto dado momento a cuminsa pusha su vehiculo, y mande den acera. “Mi a spanta hopi pasobra, el a hak mi y di repente mi a tende sonido “pa”. Mi no a pensa cu tabata un bala. Mi a bira mi cara y mira dos persona cu mascara y nan wowo so tabata visibel. Mi a pensa cu ta atracado. Mi a cera mi wowonan, pasobra mi a pensa cu si mi ta bay muri, mi ta muri wowo cera. Ora mi a habri mi wowo, mi a mira un di nan bula riba e hood. Mi amiga a nota cu e tabata tin un arma den su man. Mi amiga a cuminsa grita, a habri e porta y a cay. Mi a kere cu nan a tire, pero e ta diabetico y a bira malo,” Hortencia a conta cu lagrima na wowo di e susto cu ainda e no por sali for di dje. Door e impacto di e bala, su cara y garganta a keda yen di splenter di glas. Ora cu el a mira su amiga cay na suela, el a dicidi di slip bay su banda. Despues di tur e sucedido, un di e hendenan mascara cu a resulta di ta Polis, a kita su coverall y a bise “Lanta e señora ey y boso bay boso cas”, sin “duna nos ningun splicacion di kico a pasa ni ta mira e susto cu tur esnan den e auto a pasa den dje. Hortencia ta bisa cu el a keda hopi traumatiza. Nan a wordo hiba Eerste Hulp pero esey no a yuda pa kita e trauma. “E dispensa no ta ayudo, mi kier ayudo pa kita e trauma aki,” el a bisa. Nan a busca contacto cu un Abogado, kende a compaña nan pa Landsrecherche pa entrega keho pa actuacion di e Polisnan, cu e ta haya cu nan a actua indebido. E ta haya cu esun cu a comete e cos aki mester duna cara, y e no “sirbi pa trabou aki. Bo no por core saca arma. Ni sikiera a duna nos un aviso. Simplemente a hak mi auto y cuminsa basha bala. ...” Na momento di e sucedido tabatin cuater persona den e vehiculo cu ta Hortencia, su amiga, e yiu di su amiga y e mucha homber jong cu nan a duna lift. Polisnan a listra e hoben cu tambe a keda den shock y a bira blanco blanco. El a splica cu a baha e mucha homber a coba den su tas, pero no a listra den e auto mes. “Mi kier husticia. Mi no por biba asina, mi auto mi no kier wak mas, e ta trece mal recuerdo.” E señora a splica cu el a keda den un trauma asina grandi, cu e no por sinti ni e telefon zona cu ta e ta spanta. “Esaki no ta manera pa traha,” el a keda enfatisa cada biaha., pasobra bien ta cu nan por a haya nan morto tambe.
 |
Mustra/Kita e formulario di comentario
