| Minister Otmar Oduber a reuni cu miembronan di AHATA y sindicato |
 |
 |
| Sunday, 03 February 2013 17:49 | |||||||||
|
Fin di siman pasa Minister Otmar Oduber tabatin reunionnan cu miembronan di AHATA y tambe sindicato pa busca un solucion na mesa pa loke ta trata e impasse cu a presenta pa loke ta trata referendum. Manera ta conoci, for di algun tempo caba AHATA y sindicatonan tin un opinion diferente pa loke ta trata organizacion di referendum na hotelnan y den e caso aki Minister Oduber a intermedia pa busca un solucion na mesa. Pa basta aña caba e practica pa loke ta pidi referendum a permiti pa esaki wordo haci pa departamento, algo cu tur actor tabata di acuerdo cune. Poco tempo atras a bay un poco mas leu caminda cu a cuminsa pidi referendum pa sub-departamentonan, caminda algun lugar a acepta esaki. Awor AHATA a tuma e posicion cu nan no ta di acuerdo no solamente cu pidi referendum pa sub-departamentonan, pero tampoco pa departamentonan. E posicion aki e sindicatonan no ta comparti y for di eynan e impasse a bin. Minister Oduber a indica cu e ta sostene e referendum pa departamento y pa loke ta trata e sub-departamentonan, esaki mester wordo studia mihor. Di e forma aki el a sinta inicialmente cu AHATA pa scuchanan y presenta su punto di bista y siguientemente el a sinta cu sindicatonan pa haci mesun cos. E ta considera cu e situacion aki por wordo regla na mesa caminda por busca e mihor solucion pa clase trahador, dunador di trabou y sindicatonan, pa di e forma aki por sigui traha na bienestar di nos forsa laboral y di nos pais Aruba.
|
Mustra/Kita e formulario di comentario
