Friday, 18 April 2014
Gobierno: Pronto Ballpark di Sabana Grandi ta bek den ful forsa Print E-mail
Sunday, 03 February 2013 17:41

Sabana Grandi ballpark

Facilidadnan deportivo ta un punto importante den e plan di Gabinete Mike Eman y p'esey mes nan no ta keda afo di e accion di bario. Prome Minister ta gusta tira un bista con nan ta funciona den convivencia cu e hendenan di e bario y den e caso di Sabana Grandi, kico mester drecha pa pone e veld di bala bek den funcion.

E mandatario a topa cu Chichi Maduro-Yarzagaray y Richard De Luvio, ambos dirigente di e club deportivo, kendenan a mustr'e e facilidadnan di e tereno, kico a wordo haci y kico tin mester ainda. “Actualmente no tin algo den sabana grandi pa hobennan por haci deporte,” asina sra. Chichi a bisa. E ta di opinion cu mescos cu tur otro veld a haya luz pa haci deporte anochi, nan tambe ta haci un peticion di curason pa e bario di Sabana Grandi por yega na luz pa nan haci uzo di dje. Den su mayoria e hobennan ta hunga softball, pero tempran so y e club no ta conta cu e recursonan pa haci e instalacion di luz nan mes. “Falta di subsidio caminda no ta tur ora tin recurso pa haci actividad.” Nan kier pone e veld na disposicion di ekiponan di mucha, hoben y tambe adulto, pero esey no ta posibel den e condicionnan actual. Principalmente pa e muchanan di e bario, ta importante pa nan tin un luga caminda nan por haci deporte. “Ta riba hubentud nos tin cu fiha awo, pa haya loke mester.” Como president di Sabana Grandi Ballpark, Richard De Luvio kier mira pa e plan social di gobierno pone atencion riba e tereno di Sabana Grandi pa e por haya luz y di e manera ey e muchanan por haya un miho entrenamento. Fuera di e muchanan, tin interes tambe for di liga 50 y Aruba Softball Bond tambe pa hunga riba e tereno. Sin e luznan y si otro detayenan chikito, esey no por tuma luga. “Ora yega 5or di atardi, bo no por haci nada mas. Ora di torneo tambe ta importante,” De Luvio a splica. Prome Minister a papia cu Dito Acosta, di su ministerio encarga cu loke ta trata facilidad y eventonan deportivo. Acosta a uni den e recorido di e facilidad y a tuma nota di loke e tereno mester, como por ehempel un bon backstop y waya pa proteha e publico den tribuna. E tribuna riba nan mes ta bon construi di beton, bloki y palo; un sistema mas duradero cu e tribunanan traha di metal. E idea ta pa traha hunto cu e directiva di Sabana Grandi Ballpark pa di e manera aki haci loke ta necesario pa pone e tereno bek den ful funcionamento. “Mi a combersa cu Minister Presidente, el a priminti cu e ta bay haci su best pa nos haya luz, backstop y tribune. Nos ta contento cu el a pasa pa e duna su aporte pa Sabana Grandi tambe bay dilanti. E bario di Sabana Grandi mester algo paso e no tin nada,” asina e president di e club deportivo a bisa. Hunto cu Gabinete Mike Eman e directiva ta bay percura pa chapi e tereno di wega, roza esun rond pa autonan por staciona, como tambe verf e tribuna y haci otro trabounan necesario den backstop y dugout. Recientemente gobierno, incentivando tambe e sentido comunitario di comercio y boluntarionan di bario, a cuminsa un proceso pa yuda reconstrui y/of revitalisa entre otro veld di Calabas, veld y Centro di Bario Ayo, ta trahando actualmente riba revitalisacion di veld di Universal, veld di Rockets na Santa Cruz, BMX Weg Sero Preto y Warawara. Loke tambe tabata un logro y alabes un alivio grandi pa mundo deportivo na Aruba, tabata protocol “Aruba cu Deporte na Pecho”. Un protocol cu a firma cu tur facilidad deportivo y centronan di bario rond Aruba cu por of kier haci uzo di luznan riba nan veld. Mirando cu prijs di coriente ta un peso grandi pa e tipo di organisacionnan aki, e protocol ta duna facilidad y organisacionnan deportivo un prijs di coriente hopi rasonabel, 50% di descuento riba e prome 1000 kWh. Cu esaki gobierno ta spera cu por incentiva movecion en general na Aruba, pero tambe specificamente un crea un incentivo mas concreto pa facilita cu hobennan por practica nan deporte preferi di un manera mas flexibel. Prome Minister Eman tabata contento di tende for di e lidernan di e bario cu tin un interes grandi pa haci uzo di e tereno. Hunto gobierno y bario di Sabana Grandi ta bay percura pa dugout ta den condicion cu ekiponan di little league por bin practica y tene wega di torneo. Fuera di esey mayoria ekipo di softball, manera esnan di chauffeurnan di taxi y liga mayor tambe ta wardando, pa mescos cu aña pasa, pone nan torneonan exitoso. Premier Eman tin confiansa cu pronto esaki ta e caso. Deporte y movecion ta un papel primordial den vision di Gabinete Mike Eman y esey ta riparabel den e trabou cu a haci te aworaki subsidiando e tarifa di electricidad pa terenonan deportivo, haciendo mantencion di e facilidadnan y tambe organisando clinica y eventonan. E recuperacion di tereno di Sabana Grandi tambe ta bira realidad.

Comentarionan (1)Add Comment
zakazulo
February 03, 2013
201.229.79.42
Votes: +8
...

Richard cu asombro mi por lesa cu bo ta pidi Prome Minister pa drecha e ballpark di Sabana Grandi. Asina e muchanan por practica deporte. Mi ta corda cla cla cu dia cu MEP, Minister Ramon Lee a pone e prome piedra pa traha e stadion na Winston, abo tawata eynan presente. Bo comenterio tawata cu ora bo gobierno (AVP) sinta boso lo basha esaki abow, pa traha cas. Unda lo bo tawata kier pa muchanan bai hunga bala??? Esaki ta tipo di dirigente cu Sabana Grandi tin!!!!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter