Saturday, 01 November 2014
Un bon comienzo pa Afdeling Consumentenzaken cu 32 caso registra y trata Print E-mail
Thursday, 31 January 2013 20:54

Luciano Maduro

Luciano Maduro, ken ta traha den e Afdeling Consumentenzaken, a hiba palabra den conferencia di prensa. El a splica cu e minister tabata tin un deseo pa registra kehonan di e consumidor. Un total di 32 persona a bin entrega un keho y asina e casonan aki a wordo atendi. Luciano Maduro tabata tin algun ehemplo y con nan a intermedia.

Maduro a splica cu aña pasa na Maart, den cuadro di e minister di economia su maneho el a pidi pa alza e nivel di proteccion na consumidor, door di atende e kehonan cu e tin y esey a inicia mesora cu e conferencia di e consumidor a termina. E conferencia mes a yuda concientiza e consumidor cu e mester ta mas critico y pa e wordo motiva pa e busca su derecho ora e cumpra un producto cu no a bay bon y no por a solucione cu e negoshi, y cu nan por acerca un organismo y registra e keho. Desde cu e departamento a cuminza funciona a registra 32 keho den cual tin 19 intermediacion. Diferente ehemplo a ser menciona pa Luciano Maduro unda a destaca cu hopi biaha e garantia pa cierto productonan ta pa un tempo hopi cortico, mas cortico mes cu loke ley ta stipula. Kehonan ta varia y esaki ta encera for di situacionnan no higienico den supermercado te cu prijs riba label di un producto mientras cu den e caha ta cobra otro prijs, problema cu mecanico di auto, articulonan electronico cu for di principio no ta funciona y otro tipo di servicionan. El a splica tambe cu no tur momento e consumidor tin razon pero e mes ta fout. Maduro a bisa cu mayoria di productonan cu a crea keho nan prijs ta menos cu 500 florin, pero tin algun cu ta entre mil pa 10.000 florin. Luciano Maduro ta haci un apelacion na tur consumidor cu mester di esaki pa haci uso di e servicionan di e afdeling aki sea via telefon 5829914 of facebook/twitter of pasando personalmente. Riba pregunta di prensa el a splica cu for di momento cu un consumidor bay na e afdeling cu un keho, ta cuminza un proceso legal. Tin consumidornan cu ta bay reclama e comerciante pero no sa con pa papia cune y tin biaha nan ta bay rabia; e departamento tin su politica con pa trata cu e comerciante y busca su banda di medaya tambe na un manera serio y obhetivo. Nan ta apela na e buena fe di e negociante pasobra den principio e ta hopi importante, sinembargo tras di esaki semper e ley ta para. El a splica ademas cu e minister ta trahando riba un otro ley pa atende cu casonan caminda e comerciante no ta dispuesto na cumpli cu loke e ley di derecho pa consumidor ta stipula.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter