Wednesday, 23 April 2014
E prome reaccion di prof.dr.Wubbo Ockels ora el a yega Aruba tabata “Mi ta sinti mi bon bini. Mi a yega cas” Print E-mail
Tuesday, 22 January 2013 18:33

ockels IMG 5283

Diadomingo e barco di bela cero emision Ecolution di e prome astronauta Hulandes y e guru riba tereno di sostenibilidad prof.dr.Wubbo Ockels a yega Aruba. E expectativanan pa su yegada tabata halto. For di tempran caba por a mira hende para canto di lama pa mira Ecolution drenta Aruba. Ningun hende a keda decepciona, pasobra cu di basta cerca por a mira e barco mahestuoso pasa riba e lama cristalino pa despues drenta na Renaissance Marina na unda bou hopi animacion el a mara. Unda cu a mira tabatin mirones wardando e yegada. Na e pier mes na unda Minister Plasterk, Prome Minister Eman y ministernan di su Gabinete tabata warda pa saluda Ockels y su tripulacion, no tabatin caminda pa pone mas hende. E ambiente cu tabata wordo sinti tabata colma cu sentimentonan euforico y di energia positivo. Aruba un bes mas ta para dilanti cambionan grandi. Aruba a enfrenta y a surpasa hopi reto den e ultimo añanan. Awor e isla aki ta para dilanti di un otro reto grandi. E reto ambicioso pa converti e isla aki den un economia 100% berde na 2020. Yegada di Ockels y Ecolution ta hiba nos un paso mas leu den e direccion aki. Despues di mas di dos luna riba lama Ecolution a yega Aruba. E cantica ‘Support the Green’ di Offshore den cua ta pidi atencion pa naturalesa cu letranan apropia pa e momento memorabel aki, a duna realce na e yegada. Mescos cu otronan Ockels tabata contento na momento di a yega Aruba, cumpliendo asina cu loke e y su tripulacion a pone nan dilanti. Crusa transatlantico riba solamente energia di biento. Un reto grandi. Un reto cu a wordo confronta y surpasa. Ockels a bisa di ta sinti su mes masha bon bini aki. “Mi ta sinti cu mi a yega cas. Esey tabata e sentimento cu a domina cerca mi ora mi a yega Aruba”. Ockels ta haya importante cu apesar di e reto enormemente grandi, toch semper tabata existi e sentimento di confiansa. E confiansa cu tur cos ta bay sali bon. “Tin asina hopi trabou intelectual y calidad hinca den e barco aki cu no por ta otro cu tur cos ta bay sali bon. Mescos cu Javier Sint Jago mi kier bisa cu si una bes bo a haci un biahe asina bo por uza e experiencia como ehempel di e biahe cu Aruba mester haci pa yega na un Aruba duradero. Den cuminsamento esaki ta bay tin su reto y contratiemponan, pero na momento cu e keda logra, anto e resultado ta: e mesun alegria cu nos a haya awe ora nos a yega cu Ecolution. E ora bo por cosecha. Cosecho di e dedicacion. E ora coriente no ta bay costa nada mas. E ta bira accesibel pa tur hende y e alegria ta resona den tur hogar”. Ockels a bisa di ta convenci cu si Aruba tuma e paso ey como un di e prome islanan na mundo cu e isla aki ta bira unico. No solamente pa e Arubiano, pero tambe pa otronan. “E turista lo kier bin aki, parehanan recien casa kier bin pasa nan honeymoon aki. Nan kier bin na e isla cu ta bon pa futuro di mundo. Pasobra e futuro ta bon pa nos yiunan y nos nietonan. Esaki ta algo cu ta importante pa tur hende. Mi ta haya fantastico cu e reto a wordo lansa aki”. Ockels ta e prome astronauta Hulandes y tambe e prome cu a haci un biaha transatlantico den un boto manera ‘Ecolution’. E ta compara e reto cu Aruba a pone su dilanti cu tanto su biahe den espacio como cu su biaha riba oceano. “Mi sa cu si bo tin e bon mentalidad y esey mi ta mira cu tin na Aruba, anto bo ta logra bo meta. E prijs cu bo ta haya despues ta fantastico”. Algo curioso tabata si e awa cu nan mes a destila abordo di Ecolution tabatin bon smaak. Ockels a bisa cu prome cu nan a yega Aruba nan a pasa na un isla chikito cu yama ‘Los Roques’. Un isla Venezolano na unda ta biba mil hende. Eynan e duana a subi e boto pa haci inspeccion. “Masha cariñoso. Mi a puntr'e si e kier a bebe un poco awa. Mi a splik’e cu ta awa cu nos mes a traha for di awa di lama. El a bebe y a bisa mi ‘esaki ta e miho awa cu mi a yega di bebe den mi bida’. Un tremendo reaccion”. Cu esaki tur duda si e awa ta smaak bon of no, ta pasa pa pasado.

album album  

Comentarionan (4)Add Comment
jos
January 23, 2013
201.229.78.142
Votes: +6
...

awel cu nan bisa cualkier persona cu e ta bay riba un vac cu tur cos paga mas zakgeld di hopi $$$$ ta ken no lo sintinan na cas

uncle Ed
January 23, 2013
201.229.14.74
Votes: +6
...

Ami tambe lo a sinti mi na cas door di e recepcion grandi sin a haci algo pe.Pa nan e fiesta y pa nos e cuenta. Wanta duro shon nan.

Fabio Cannavaro
January 23, 2013
201.229.37.219
Votes: +6
...

Mi tambe lo a sinti bon bini si mi haja mas cu 1 miyon florin pa un bootreisje.

serapio di mahuma
January 22, 2013
201.229.74.80
Votes: +16
...

Team di campaya 2013 di Mike mes ta toka, nan mes ta baila. Nan mes ta traha un 'heading' pa e noticia como si fuera ta asina a pasa of ta asina a ser bisa.

Sigi traha e bom....

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter