Saturday, 20 December 2014
Prome Minister Mike Eman a conoce e potencial grandi di Serenity Park pa bienestar integral Print E-mail
Tuesday, 22 January 2013 18:22
Comparti

Serenity DSC 0373

Rondona pa e naturalesa di Aruba y cu un bista magnifico di un gran area di nos isla, Prome Minister Eman algun dia atras a contempla e beyesa y potencial di Serenity Park. E propiedad maneha pa famia Paalman tin varios aña desaroyando un concepto caminda kier ofrece na e hendenan di Aruba y di mundo, un luga caminda por haya bienestar integral. E mandatario a wordo ricibi dor di sra. Desiree, su señora Mama y rumannan pa disfruta di un delicioso lunch na final di e Accion di Bario cu tabatin na Rooi Kochi. “Nos ta un parke chikito cu potencial grandi,” asina sra. Desiree Paalman a cuminsa su presentacion na Prome Minister y e hendenan di e bario cu tabata compañ'e. E idea principal ta cu nos por siña e comunidad kico nos naturalesa tin den dje. Ubica den un parti halto di Rooi Kochi, den districto di Savaneta, Serenity Park ta un atraccion scondi cu ohala mas y mas di nos hendenan por bishita pa beneficia di su bondadnan. Consecuentemente sra. Desiree a bay over na menciona e potencial di e parke den diferente aspectonan importante di nos sociedad. El a cuminsa na indica cu na nivel social, Serenity Park ta un luga excelente pa organisa dianan di famia y encuentronan den grupo. E luga tin un gazebo y un ruta, pero tin mas facilidad planea. Pa loke ta e parti educativo, nan ta desea pa cada tipo di mata den e parke por haya un borchi cu ta indica su nomber crioyo y cientifico, ademas di un splicacion breve di e uso cu nos antepasadonan a dune. Hudicialmente tambe Serenity Park por aporta na nos pais. Ya pa añanan e organisacion ta trahando hunto cu reclassering. Di e manera aki, personanan cu tin un debe cu comunidad, ta cumpli nan castigo haciendo trabou publico. Basa riba e exito ey, actualmente e parke tin algun tempo ta desaroyando un plan cu KIA pa presonan menos peligroso, por haci algo util cu nan tempo y aporta tambe na nan rehabilitacion. Segun sra. Desiree, esaki lo ta beneficioso paso ta elimina un gasto di mantencion cu ta permiti nan no cobra entrada pa e parke. Indudabelmente, e sector turistico tambe por wordo beneficia dor di e existencia y operacion di Serenity Park. “E turista ta bin, relaha y conecta cu naturalesa.” Nan ta planea pa bin cu un gazebo extra caminda bishitantenan por tuma masashi den aire liber. Adicionalmente kier ofrece opcionnan di comemento saludabel manera juice di berdura y fruta local, saladanan fresco y cuminda crioyo. Otro idea ta pa haci tournan di mountain bike dor di e parke y na final di dia, bay na e punto mas halto pa disfruta di un bunita bista di bahada di solo. Otro sector cu tambe por haya su mes beneficia, y na opinion di famia Paalman esun mas importante, ta esun di salud publico. Na september proximo nan lo bay un instituto na Merca cu ta mundialmente conoci pa cura diferente malesanan cronico pa medio di tratamentonan natural. Nan ta bay atende un curso di nuebe siman. “Nos kier aporta na e plan nacional contra obesidad. Come saludabel y un bida spiritual bon balanza ta caminda nos kier yega,” sra. Desiree a splica. El a afirma cu tur esaki ta posibel solamente si tur e personanan y entidadnan concerni ta wak den mesun direccion. Gratamente impresiona pa tur loke el a wak y tende na Serenity Park, Prome Minister Mike Eman a expresa di ta masha contento di por a bishita e luga. E mandatario a duna di conoce cu “Den contraste cu e trankilidad di e lugar, ta e determinacion di Desiree, kende pa añanan caba ta cana y insisti pa e derecho di existencia di e parke.” Prome Minister Mike Eman ta kere cu Serenity Park por ta un parti importante di e desaroyo social, comunitario pa nos hendenan haya mas harmonia, serenidad y reflexion. “Awe nos ta testigo cu en berdad e parke tin e potencial ey,” el a indica convicentemente y cu e disposicion pa scucha mas y duna un man caminda por pa yuda famia Paalman yega na e meta cu lo ta na beneficio di tur hende na Aruba.

album album album
album album  

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter