| Diarason awor 23 januari presentacion di e buki hopi pidi “Trabao a habri na Cuba” di Jose Miguel Donata cu sosten di UNOCA |
 |
 |
| Monday, 21 January 2013 16:45 |
 Esaki ta un parti masha chikito cita for di e buki “Trabou a habri na Cuba!” Arubiano na Cuba na cuminsamento di siglo XX di Jose Miguel S. Donata.
Jose Miguel ta dedica e buki aki na tur e Arubianonan di antes, cu durante un epoca dificil cu nos isla a conoce, mester a riesga nan bida crusando lama den barco di bela pa bay traha na Cuba. Nan ta persona cu a mustra un determinacion y curashi hopi grandi pa tuma un decision di bay traha leu for di Aruba. Y, di un of otro manera nan a laga evidencia atras pa nan descendientenan, tanto na Aruba como na Cuba. E buki Jose Miguel ta dedica tambe na e cantidad desconoci di Arubiano cu no a sobrevivi e biahenan of cu nunca mas hende a bolbe tende algo di nan. ....nan ta laga un bashi den e curason di nan sernan keri. Jose Miguel S. Donata a nace na Aruba ta docente di Spaño y tin un Bachelor of Arts y un Master of Arts den Languages and Cultures of Latin America/Spanish. Su pasion ta pa e Historia (Oral) y e Folklore di nos isla y e aspectonan tipico Arubiano di nos lenga Papiamento. E relacionnan Internacional di Aruba principalmente cu pais den region di Latino America y Caribe tamba ta otro di su interesnan. Recien Jose Miguel a publica e buki “Cariñosamente ...Recuerdonan di mi wela y otronan”. Pa su di dos buki “Trabou a habri na Cuba” Jose Miguel a haci investigacion na Aruba cu sosten di Archivo Nacional Aruba y tambe biahenan pa un periodo na Corsow y Cuba pa cua ela ricibi sosten financiero di Prins Bernhard Cultuurfonds y UNOCA. Diarason anochi dia 23 di januari na Archivo Nacional Aruba Jose Miguel lo presenta cu sosten di UNOCA su di dos buki “ Trabou a habri na Cuba!”. Tur hende ta bonbini! UNOCA por sigura comunidad cu Jose Miguel a traha cu alma y cuerpo na e proyecto y ta combenci cu algun informacion den e buki lo mishi un rato cu curason di hopi lesado. Ariba e anochi aki Jose Miguel lo comparti tambe algun informacion interesante y ta dispuesto pa firma e buki pa tur cu cumpra e buki e dia ey. Por ultimo UNOCA ta desea di comparti su experiencia di ultimo añanan esta cu tin un tendencia/necesidad/concientisacion creciente den nos comunidad na informacion historico-cultural di nos propio isla/hendenan/grandinan! Pesey Shonnan corda cumpra e buki aki na tempo pa no experiencia un otro “sold out”!! |
Mustra/Kita e formulario di comentario
