Friday, 21 November 2014
Minister Dowers a yama 20 hoben bon bini den e team di husticia Print E-mail
Thursday, 03 January 2013 18:19
Comparti

kia opleiding

Riba e di tres dia di 2013 durante un ceremonia cortico Minister di Husticia y Enseñansa, mr drs Arthur Dowers a desea 20 hoben bonbini na e team di husticia di Aruba. E hobennan, kende a cuminsa nan opleiding diaranson, despues cu nan completa nan educacion lo bira miembro di e team di siguridad di KIA. E mandatario a enfatisa con importante nan integridad personal ta, y pa nan cumpli cu e reto nan dilanti cu seriedad.

"Hopi hende tin deseo pa haya e oportunidad cu boso a haya," Minister Dowers a bisa, añadiendo cu e hobennan ta pertenece na un grupo cu a wordo selecta meticulosamente, pasobra hopi persona kier y ta purba, pero masha poco ta cualifica pa un trabao den e area di husticia. E titular di husticia a splica cu pa cuminsa un persona cu kier traha na KIA como cuidado di preso no por tin miedo di e trabao, e mester tin un condicion fisico adecua y, mas importante cu tur cos, e persona no mag di tin antecedente cu ta indica cu el a kibra cualkier ley. Minister Dowers a splica cu e carera di cuidado di preso ta interesante y ta un trabao di hopi responsabilidad. Sr. Dowers a bisa cu e ta considera e profesion aki uno di admira pasobra e contribucion di e cuidado di preso ta esencial den e trayectoria di husticia, incluyendo e proceso di rehabilitacion di e preso. El a pidi e hobennan pa no subestima e talento di e presonan pa manipula nan y nunca laga nan integridad personal un banda, pasobra di e prome momento cu nan mester desvia di e caminda corecto no tin forma pa drecha esaki bek. Minister Dowers a pidi e studiantenan pa nan reacciona di biaha, busca sosten, papia cu nan superiornan na e minimo intento di un preso pa purba haci nan desvia di e caminda corecto y asina nan por evita di perde nan integridad y nan carera. "Nos kier pa cosnan cana corecto den nos departamentonan y nos ta haci un esfuerso tambe pa cosnan bay asina," Minister Dowers a bisa. El a splica cu cada biaha cu e mester firma un landsbesluit pa kita un persona cu a atacha e integridad y confiansa di e team, e ta haci dolor y e no kier pa esaki sosode, pero pa e hobennan tuma e oportunidad aki y haci bon uzo di dje pa crece den un carera den husticia na KIA.

Comparti
Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter