| Rudy Lampe:Partido RED ta propone number di auto moderno y ta puntra unda e placa a keda di e fondo pa medio ambiente di Valero |
 |
 |
| Thursday, 03 January 2013 12:06 |
 Bon aña. Den e dianan aki mester busca plaachi nobo di number di auto. Ta cuestion di para atrobe den rijnan largo. Cada aña e mesun storia. Ta trata di un molester y gastamento di placa innecesario.
Tur pais moderno tin un number di auto codifica, cu bo no ta cambia cada aña. Bo ta paga bo impuesto pa hasi uso di nos careteranan y e informacion aki ta disponibel ora e polis ta lesa cu su aparato e number codifica di auto. Ya no ta cuenta di bai para den rijnan largo pa busca bo number cada aña di nobo. Ademas Pais Aruba ta spaar hopi placa. Ta costa placa pa laga traha cada aña plaachi nobo. Na fin di aña ta hopi plaachi gobierno mester tira afo, ya cu no a bin busca nan. Claro cu algun hende ta gana placa cu e negoshi aki, pero pa Pais Aruba e ta un malgastamento di placa. Gobierno ta pretende cu Aruba ta un pais di cinco strea, pero ainda nos ta usa sistemanan atrasa. Ora ta cumbini interes di e gobernantenan nan ta papia di pais di cinco strea. Pero e sistema anticua aki di number di auto no ta cumbini interes di pueblo di Aruba. Papiando di hopi placa, RED ta puntra gobierno unda e placa di e fondo pa medio ambiente di refineria Valero a keda. Den pasado Valero a cumbini cu lo crea un fondo pa medio ambiente, mirando cu Valero no tabata paga impuesto y e refinacion di petroleo tabata daña nos medio ambiente. Cada aña Valero tabata deposita placa den e fondo aki y esaki a acumula un suma miyonario. E pregunta ta, awor cu e refineria a sera su portanan, unda e placa ey ta? Di cuanto suma nos ta papiando? Ken ta responsabel pa e fondo aki? E fondo multimiyonario aki tabata riba un cuenta di un banco local y su unico destinacion mester tabata pa proteccion di nos medio ambiente. A cumpli cu esaki? RED lo tin un brindis di aña nobo cu lo tuma lugar dia 11 di januari 2013 na ATIA building y e ta cuminza pa 19.00. Durante e brindis lo tin un charla di Henk van Breukelen riba un punto di nos programa electoral 2013 cu ta derechonan di hende grandi y di esnan cu necesidad special. Entrada lo ta gratis, tur hende ta bon bini pa nos cuminza celebra di e forma aki e prome lustro di Fundacion Elsa Coffi y di dos lustro di partido RED.
|
Mustra/Kita e formulario di comentario
