Sunday, 23 November 2014
Discurso Nacional di Prome Minister Mike Eman Print E-mail
Monday, 31 December 2012 20:57
Comparti

Dim lights

Anualmente Prome Minister Mike Eman ta refleha bek e aña cu ta tras di lomba. Pa 2012 a pone enfasis riba harmonia, dialogo, desaroyo sostenibel y gratitud. Pa Eman y su gobierno ta di sumo importancia cu e prosperidad di nos pais mester wordo acopla na un mehoracion social. Un prosperidad comparti segun e mandatario. Click lesa mas pa e discurso completo...


Apreciable Conciudadanonan,

E biento fiho y constante di nos Pais y e mata di Watapana, Fototi y Divi Divi cu ta crece memey di tur secura tabata fuente di inspiracion pa un obra musical, “One Way Wind” di e grupo musical The Cats cu den su tempo tabata riba e lista di cancion favorito den paisnan grandi.

Di momento cu nos a asumi responsabilidad un poco mas cu tres anja pasa den un situacion dificil di crisis y retonan grandi e leccion cu e icona aki di nos flora ta sinja nos a sirbi nos tambe di inspiracion pa nos Pais: traha cu e forzanan di nos Creador y Aruba lo supera, crece y florece.

Cu respet pa dignidad di e ser humano nos a sali den busqueda di harmonia y dialogo bek den nos Pais.

Cu realisacion cu destino di nos tur ta acopla na otro nos a inverti den restablece relacionnan constructivo den Reino y cu paisnan y partnernan di un valor strategico pa nos isla.

Cu un vision fiho riba un desaroyo cu mester trece progreso y oportunidad pa un y tur riba nos baranca nos a delinea un rumbo nobo pa nos Pais.

E promer oranan di e cambio a respira e union y orguyo nobo den Pais. Di tur skina voluntarionan, hoben, grandi, jiunan di tera y ciudadanonan nobo, rico y pober a sinti nan mes yama pa juda restaura e edificio nacional di gobernacion di nos Pais.

Paden y pafor, na vloer y riba dak, muraya, porta y bentana mannan valente y noble tabata traha cu curason, desinteresadamente, di dia y anochi, pa ora e dia yega cu bandera di Aruba bai laira y anuncia un gobernacion nobo, por tabata tin para atrobe un Cas di Gobernacion cu ta radia den su mero esencia di e acto di voluntarismo aki: Un gobernacion di Pueblo, cu Pueblo pa Pueblo.

Pueblo a haci su parti. Pueblo a bai urna electoral, a escohe un rumbo nobo di cambio y a hiba su compromiso cu su eligidonan te na e rescate di e cuna di gobernacion di nos Pais.

Cu un curason conmovi pa e sosten y confiansa aki nos a asumi nos responsabilidad cu un compromiso total pa traha dia y anochi pa cumpli cu nos promesanan, pa haci realidad e sonjonan y idealnan di cambio cu nos a comparti cu nos Pueblo. Haci realidad un gobierno di Pueblo, cu Pueblo pa Pueblo.

E momento trancendental aki tabata pidi no unicamente pa cambio di un gobernacion cu a laga Pueblo y Pais den un deteoro fysico y social, pero e momento tabata pidi tambe un refleccion mas profundo riba e desaroyo di e ultimo 25 anjanan.

E merito di e logronan di e ultimo 25 anjanan tabata evidente den un crecemento rapido y imprecionante. Pero e mesun crecemento grandi aki poni den contexto di e realidad di e calidad di bida di miles di nos conciudadanonan, e contraste entre hotelnan di 5 strea y e deteoracion di nos barionan, di nos schoolnan, centronan di ciudad, infrastructura, casnan di nos grandinan, edificionan historico, hospital y nos areanan publico, majoria leuw di 5 strea ….tabata pidi pa un refleccion mas profundo riba sostenibilidad, riba con mihor por traduci progreso economico den bienestar general. Con por trece mas equidad social den distrubucion di oportunidadnan di desaroyo y di bienesnan di nos Pais. Con mihor por percura pa un desaroyo economico mas diversifica cu oportunidadnan nobo den technologia y sciencia pa hobennan profesional.

Aruba su Producto Bruto Nacional den 25 anja a conoce un crecemento di 400 miyon dollar pa anja pa 2.8 biyon dollar, seis vez multiplica.

Pero un politico importante den historia Robert F Kennedy a yega mustra ya den anjanan 60 cu demasiado hopi y demasiado largo, ta parce cu nos a sacrifica excelencia y balornan di comunidad djis pa acumula cosnan material. E a mustra cu nos no por midi e realidad di un Pais unicamente na su producto bruto nacional. Pasobra den esaki ta worde conta tambe cosnan cu no ta bon pa bienestar di hende.

Producto bruto nacional no ta bisa nada di e salud di nos yiunan, ni e calidad di nan educacion of e placer di nan weganan. E no ta inclui e bunitesa di nos poesia of e intensidad di nos matrimonionan; e inteligencia di nos debatenan publico of e integridad di nos oficialnan publico. E no ta midi tampoco nos comprension of nos curashi, tampoco nos inteligencia of nos estudio, ni nos compasion of nos devocion pa nos pais, den corto bisa: e ta midi tur cos, cu excepcion di loke ta haci bida ta vale la pena y relevante. E ta bisa hopi di nos pais, pero no pakico nos ta orguyoso di nos Pais.

                                                                                     

Si… e ta importante cu Banco Central, despues di dos anja di caida di nos GDP, na 2009 cu 8% y na 2010 cu 4%, a registra pa 2011 un crecemento di casi 10%, e anja aki atrobe un crecemento apesar di e situacion cu e refeneria y otro anja ta projecta un crecemento di 5%. Pero mas importante ta cu awor nos ta haci un esfuerso grandi pa acopla e crecemento aki na mehoracion social.

Cu e meta aki, continua den e forma di antes sin midi kico e impacto economico tin riba e desaroyo social no tabata un opcion. Prosperidad pa algun basa riba destruccion ecologico y inhusticia social persistente, no ta un fundeshi pa un sociedad civilisa. Restauracion economico ta di vital importancia. Proteha trabao di cada ciudadano – y crea trabou nobo – ta imperativo. Esaki den contexto di e sentido nobo di prosperidad comparti y un desaroyo sostenibel.

 

Pesey e concepto di gobernacion riba su mes tabata den un necesidad urgente pa inovacion. Uno nobo di busqueda di harmonia y dialogo. Di acopla metanan mas integralmente na otro.

 

E crisis economico a presenta nos cu un oportunidad unico pa inverti den e cambio aki: pa cambia e pensamento-riba-termino-corto pa remplas’e cu politica razona, capas pa embarca e retonan enorme pa asina logra establece prosperidad duradero.

Pesey nos a escohe pa combina e nececidad pa un recuperacion economico y di empleo cu e nececidad pa reconstrui e infrastructura di bida civico; skolnan tur rond di nos isla, renoba nos barionan, revitalisa nos centronan di ciudad, restaura nos edificionan monumental den tur nan aspectonan historico cultural, crea parkenan y lugarnan publico di recreo nobo, centronan di recreacion, renoba nos bibliotecanan, crea plazanan, tur al menos idealisticamente, ta atrae hende pa traspasa e bareranan di nan casnan y diriginan na e espacionan comun caracteristico y atractivo di un ciudadania democratico comparti. Un vision economico mara na un vision y un ideal social comunitario.

Pesey nos a concentra nos esfuersonan no simplemente riba locual ta laga nos economia crece, pero cu ta mehora tambe e calidad di bida di nos hendenan.

 

Nos asercamento tabata basa riba e pensamento simpel pero importante cu un Aruba cu ta un lugar special pa biba pa nos hendenan, ta un Aruba dushi pa bishita, pasobra na final di dia prosperidad ta surpasa placernan material. E ta supera preocupacionnan materialistico. E ta habita y resalta den calidad di nos bida y den salud y felicidad di nos famia. E ta presente den e forsa di nos relacionnan pa cu otro, y nos confiansa den comunidad. Su testimonio ta den nos satisfaccion laboral y den nos sentido di proposito comparti. E ta mara na nos potencial pa participa den forma completo den nos bida social.

 

Nos vision di un Aruba cu un desaroyo sostenibel y duradero ta acopla na e bienestar general di comunidad. E equidad social ta esencial y pesey nos a pone un empenjo grandi den cuminsa recupera e poder di compra di nos pueblo.

 

Cu un gradicimento profundo y cu admiracion pa e madurez y e sentido di responsabilidad comparti cu gremionan sindical y empreserial a demonstra mi ta wak bek riba e apertura di un epoca nobo den democracia di Aruba cu creacion di un plataforma di un Dialogo Social sin precedente. Un Dialogo Social cu a produci dos anja concecutivo tras di otro acuerdonan cu ta rescata e fondo di Pensioen di Empleadonan Publico, cu ta saca e fondo di Pensioen di nos grandinan for di su agudo eminente, cu ta introduci pa Aruba un forma di compensacion directo pa ciudadanonan recupera poder di compra cu introduccion di reparatietoeslag, incentivonan nobo pa inversion y energia berde, introduccion di Flex Pensioen pa AOV y un logro historico di un pensioen general pa tur empleado. Hunto tambe a logra baha tarifa di awa cu 30% y di coriente cu 15%.

Banda di corta BBO na mitar nos a saca un man pa esnan exclui y bibando na margennan social. Gobierno nobo a decreta e ley cu for di 1 di januari 2010 cu a aumenta onderstand cu 25% y cada yiu den un famia dependiendo di asistencia social ta haya un schoolkinderentoeslag di Afl. 200,= pa mucha. Un mama soltero cu dos yiu cu mester a biba cu Afl. 605,= tin desde nos gobierno nobo Afl. 1150.==. Esaki kiermen cu un mama soltera cu dos jiu awe tin dobel di e entrada cu nos a bin haye cune na 2009. Empleadonan public y pensionadonan public a conoce indexering tres anja tras di otro y pensionadonan tambe ta comparti den repartietoeslag.

Asina e gobierno di transformacion ta busca di realisa un mihor equidad social den nos pais.

 

Conciudadanonan,

 

E diferencia ta bisto: e harmonia den Pais, e relacionan den Reino, e crecemento di nos turismo, e atencion social, e revitalisacion di nos centronan di ciudad, renobacion di nos barionan y scolnan y infrastructura. E coneccion entre progreso economico y progreso social awe ta un realidad den nos Pais.

 

Mundo ta mirando Aruba cu admiracion y e escohencianan pa energia sostenibel y un desaroyo duradero manera encamina na Aruba ta birando un inspiracion pa otronan. Aruba su vision di revitilisacion awe ta den pleno ehecucion.

 

2013 lo ta un anja di mas progreso: trabaonan di revitilisacion di mas bario y di Centronan di Ciudad lo continua, mas scolnan lo worde renoba y caretera lo yega den areanan pa hopi anja bandona. Aruba lo conoce tambe e inicio di projectonan cu pa anjanan a worde papia riba nan, pero nunca realisa:

 

Gren Corridor; vierbaansweg entre Playa y San Nicolas lo inicia;

Waf di Container lo muda pa Barcadera;

Expansion grandi di hospital y renobacion completo den esun existente;

Ringweg rond di Oranjestad lo inicia;

5 Centro Multifuncional pa ubica hulpbestuurskantoren cu mucho mas facilidad pa comunidad lo worde construi na: Noord, Paradera, Santa Cruz, Savaneta y San Nicolas.

 

Nos di tres pilaar economico ta hayando su inicio cu TNO, Schiphol, GasUnie, Rietveld Academie na Aruba y otronan. Aruba ta birando centro di refleccion den mundo pa energia alternativa. Na mei Europe Meets Americas na Aruba lo duna contenido concreto na e potencial di Aruba como Gateway entre Europa y Americas.

 

Institutonan mundial manera Carbon War Room, Harvard University y TU Delft, partner di Aruba den desaroyo sostenibel ta poniendo Aruba riba mapa como centro di investigacion riba e tema importante di desaroyo sostenibel.  

 

Nos tin hopi pa ta orguyoso di dje despues di tres anja di empenjo y dedica totalmente na e trabao di haci un diferencia.

 

Conciudadanonan,

 

Pa nos por yega nos maximo potencial ta importante awor pa e empenjo bini di tur banda. Gobierno mester sigui haci su parti, sector comercial mester haci su parti y nos comunidad tin un gran oportunidad awor pa bira e catalisador pa e transformacion por ta total den cada rincon di nos pais. Prosperidad ta consisti di nos abilidad pa florece como sernan humano.

 

Logra den bida ta pa un parti e abilidad pa duna y ricibi amor, pa goza di e respet di nos contemporaneonan, pa contribui na sociedad den un forma util, pa tin un sentido di ta pertenece y confia den comunidad, pa yuda crea e mundo cu nos ta biba aden y haya un luga acceptabel den dje. Un componente importante di prosperidad ta e abilidad pa participa den forma esencial na comunidad.

 

E calidad di nos relacion uno pa otro; di nos pa cu nos naturalesa; pa cu nos atmosfera; pa cu nos paisahenan; pa cu nos barionan; pa cu nos hogarnan; pa cu nos futuro generacion. Esaki ta e base pa un cultura civilisa cu ta eleva nos valornan spiritual y moral na un nivel cu ta duna progreso economico y libertad humano significacion y contenido.

Mi a wordo introduci den loke nos ta sinti como comunitarismo dor di mi mama. El a lanta nos cu fe den nos Creador, cu balornan halto manera honestidad, integridad y trahamento duro. El a lanta nos cu e virtud di gratitud. Henter su bida el a biba den gratitud. E tabata agradeci na nos Creador pa a duna nos bida y pa su Creacion. Agradeci pa por a dedica su bida cu su casa cu ken el a comparti un famia, esfuersonan grandi y sacrificio; agradeci pa tur cu a yude y a trata di yude na diferente ocasion, famianan cu a yude carga su perdida, amigonan cu a extende un man di ayudo. Hendenan cu e no tabata ni conoce a duna consuelo den nos tristesa, maestronan di scol, polis, bisiñanan cu a yude cu e cargo di ta viuda, ora cu el a keda atras cu asina tanto yiu chikito pa wak pa nan. Agradeci pa e suelo di Aruba, pa su hendenan, di unda cu nan por a bin, pa su bunitesa y historia y e retonan grandi cu e mester a enfrenta, e forma cu el a biba su bida tabata testimonio di gratitud.

Basa riba e ehempel di mi mama y experiencia di bida mi a yega na e conclusion cu gratitud ta un virtud ya cu e ta exigi humildad pa admiti cu nos ta debe nos existencia, nos educacion, nos seguridad, nos salud, nos inspiracion, nos logro y nos exitonan na nos Creador, na nos mayornan, na nos famia, bisiña y amigonan, na nos comunidad y nos pais, na humanidad y na henter mundo.

Di aki, un conbenio ta nace, un responsabilidad pa bo pais y su hendenan, atencion pa un amigo leal, ayudo pa un bisiña den dificultad, pa un hoben den problema y pa un hende grandi den soledad; consuelo pa un famia cu ta sufri. Mi a conclui cu gratitud ta siña bo stima, siña convivi y comparti y cuida.

Gratitud ta un emocion positivo cu ta otro-orienta, cu tin e poder pa efectua cognicion social, motivacion y relacionnan social den precisamente e forma cu ta mehora e cohesion social den un comunidad y pa cuida balornan comunitario

Gratitud porta no semper ta den abundancia presente den bida diario, pero e tey cu raisnan profundo. E mester solamente un poco awa di ciudadanonan, mayornan, maestronan y lidernan religioso, social y politico respondiente na e nececidad di comunidad pa e por floria y trece pa nos fruta y sombra pa un forma di biba di convivencia y compasion: un miho sociedad.

Mi ta convenci cu nos vision comunitarista riba humanidad y riba sociedad lo florece ora nos standardnan rekeri y accionnan haya tera fertil den un alma y un conviccion cu ta haya su raisnan den gratitud, consciente di e bondad di otronan pa por crea un sentido di conexion y comunidad y contradeci e sentido di isolacion y distancia.

Esaki ta causa tambe cu nos tin un responsabilidad general basa riba amor prohimo y solidaridad, como ciudadano y gobiernonan pa asegura cu esnan cu ta experiencia bida cu poco pa ta agradecido, sinti e bondad cu ta haci nos sernan humano.

Bibando e bida di gratitud nos por yega mas serca di e conocimento cu nos ta conecta cu tur cu ta rond di nos – famia, amigo y colega. E sentimento aki di comunidad por penetra den tur loke nos haci, e por haci nos miho hende y por haci e mundo un miho lugar y mas trankil pa nos biba den.

Nos a sinja di e mata di Divi Divi, e icono di e flora di Aruba, di sobrebibi e clima seco y di biento duro dor di crece den harmonia cu e forzanan di nos Creador.

Laga nos gradicie awenochi pa tur locual e a duna nos y pidi su Bendicion pa nos isla y henter nos Pueblo.

Cu Dios bendiciona Boso hogar y yena Boso curason cu fe y felecidad.

Di mi parti, di mi senjora Doina, mi coleganan, Mike, Michelle, Richard, Otmar, Arthur, Benny y Edwin,

Bon Anja.

Comparti
Comentarionan (15)Add Comment
MCR
January 03, 2013
77.169.240.127
Votes: -3
...

Ay om! En corto shonnan: Loke Mike a trece aki padilanti ta pone cu e mepistanan simplemente ta troce di angustia. Anto cu e eleccion dilanti di porta! Ta esey ta tur cos!

JAV
January 03, 2013
76.4.49.249
Votes: +2
...

Wel un cos misa sigur...e realidad aworaki ta cu boso mes por wak cua ta e 'Low rated comments' aki riba hahaha. Y e no ta mustra mucho bon pa nos prestihioso Min. Pres.

... Low-rated comment [Show]
... Low-rated comment [Show]
Palabra Berdad
January 02, 2013
201.229.8.191
Votes: +27
...

Cu tur Respet pero e discurso aki parce mas y coremento di campanja enbes di ta un discurso pa anja nobo!! Ridic*lo boy!!

... Low-rated comment [Show]
El
January 01, 2013
201.229.72.187
Votes: +22
...

Etristo di tur e discurso di e Minister ta cu berdad refeneria a sera anto a core campanja cu ta Mep a sere!! Pero Nel a adverti cu e Valero no tawata serio for di cuminsamento, pero Mike a bira e asunto anto ganja Pueblo. Mira awor tur e trahador nan a bai cas anto kiko awor. Enbez cu Gobierno coy e refeneria back pa pais Aruba, e ta laga nan keda cu e transhipment cu Aruba mes por a maneha. Pero e egobierno aki no tin vision at all. Ta traha pa e capitalista nan so!! Bo no ta kere wak Aruba ta casi full di klinker anto di unda e ta bini?? RARA!!!

Pika!
January 01, 2013
201.229.53.57
Votes: +32
...

Naturlijk moeten we positief zijn. Maar mooie woorden betalen geen rekeningen... Ik wens iedereen een fantastisch 2013.

... Low-rated comment [Show]
... Low-rated comment [Show]
Leoncio Thomas
January 01, 2013
201.229.80.232
Votes: +34
...

Asina mes.... Aruba ta pata pata den lodo di tanto debe, pero ban biba alegre, fiesta tur weekend,ban bebe bai off, ban fia na banco pa loco. "Living la vida loca" ta bai ta e siguiente slogan di avp pa carnaval.

... Low-rated comment [Show]
... Low-rated comment [Show]
... Low-rated comment [Show]
!!!BERDAD!!!
January 01, 2013
201.229.124.193
Votes: +42
...

PUEBLO por observa un discurso di Prome Minister cu REALMENTE no ta bisa NADA. Pa di prome, e matanan di Watapana, Fototi y Divi Divi, NO tin NADA di haci cu GOBERNACION! Tambe Prome Minister ta bisa:"Aruba su Producto Bruto Nacional den 25 anja, seis vez a worde multiplica", pero EMAN no ta bisa NADA di e DEBE EXTERNO cu e a MULTIPLICA den solamente 3 anja di GOBERNACION! Eman ta bisa "Crea trabouw nobo", pero no ta bisa NADA cu su GOBIERNO a SERA e Refineria mandando mas di 1500 empleado cas, cu hasta e caso di empleadonan ta den corte ainda. PUEBLO por tende of lesa un mensahe pa haci POLITICA, sin CONTENIDO, siguiendo cu su MANIPULACION manera el a haci na 2009. PUEBLO no ta mira NINGUN CAMBIO cu Prome Minister Eman ta tuma pa FRENA su ACTITUD di Manipulacion!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter