| Parlamentario sra. Lorna C. Jansen-Varlack ta desea pueblo di Aruba en general un Felis y Prospero Aña 2013 |
 |
 |
| Sunday, 30 December 2012 17:49 |
|
Pa mi famia e tawata un aña hopi duro den e sentido cu nos a perde nos ruman muher mayor, un sobrino y por ultimo na luna di December nos ultimo tanta na e edad di 98 aña. Aun asina nos no a perde e fe, ni e speransa di Dios. Hopi famia aki na Aruba tambe a pasa den e dolor aki di perdida di un ser keri of perdida di trabou of pertenencianan material. E bon di e experiencianan aki ta cu nos fe ta bira mas grandi y nos tin e speransa cu mayan lo ta mihor. Nos ta convenci cu semper tin algo mihor ta warda nos. Ora nos sigui evalua aña 2012 nos por ripara riba e nivel di desaroyonan cu hopi proyecto a yega nan fase final of ta casi kla. Aruba a conoce hopi cambio positivo y esaki ta e comentarionan cu nos por scucha den pueblo y di hendenan den exterior. E cambionan aki ta danki na un Gobierno cu tin un vision grandi pa e pais aki y cu ainda tin hopi mas di realisa den futuro. Hopi ley a wordo aproba den Parlamento di Aruba pa e bienestar di pueblo en general. Awe nos ciudadanonan tin hopi mas beneficio cu nan por a pensa. E comunidad por wak progreso personal pa motibo cu Gabinete Mike Eman I a tene cuenta cu nan necesidadnan. Falta hopi mas di haci y cumpli, pero pueblo tin e confiansa cu e Gobierno aki a prueba cu e tin Aruba su bienestar na pecho. Aña 2013 lo ta un aña cu retonan grandi. E aña unda pueblo mester refleha y evalua e cambionan cu a tuma lugar riba nos dushi pais. E ta un aña unda un biaha mas Partido AVP lo pidi confiansa y cooperacion di pueblo di Aruba pa sigui cu e bon trabou cu nan a desplega di oktober 2009 te awor. Nos lo sigui traha cu un actitud positivo pa sigui hiba pais Aruba dilanti. Un biaha mas mi kier a desea un y tur un Felis 2013 y cu Tata Todopoderoso por drama su bendicion riba e pais aki ricamente. HAPPY GREEN 2013 ! |
Mustra/Kita e formulario di comentario
