|
Dia 31 december, na vispera di un aña nobo, ta mas cu oportuno pa tira un bista riba e aña cu a pasa, y duna un bista kico por ta bai spera nos den e aña nobo nos dilanti. Aña 2012 pa hopi di nos ciudadanonan tabata un aña dificil, na unda nos por mira cu criminalidad, trafico insigur, costo di bida halto, desempleo y falta di atencion social y di cuido medico, a afecta hopi hende aki na Aruba; esaki mientras cu nos tin un gobierno cu den un tempo di crisis ta pone atencion na cosnan material y tin di nan te hasta innecesario.
Nos por mira proyectonan grandi cu duracion largo pa falta di un bon maneho, cu ta simplemente beneficia esnan yega na gobierno of ministernan, mientras ta tira santo den wowo di pueblo cu un verf na un school aki, verfmento di algun cas, limpieza den algun bario, dorna rotondenan cu placa di comerciantenan y actividadnan manera Carubian y conferencianan, pa pone pueblo kere cu ta un progreso total. Pero e progreso aki berdaderamente ta limita na algun beneficiaronan so.
No tin mester di menciona mes e actitud iresponsabel di nos minister di Husticia, cu falta tur atencion y maneho na e situacion di seguridad aki na Aruba, cu a para deteriora. Esaki cu consentimento di e parlamentarionan cu ta sostene gobierno, di Minister Presidente di Aruba, di partido AVP, di prensa comprometi, di gremionan comercial y di algun sindicato.
Nos por mira tambe falta di atencion di minister di Salubridad, cu constantemente ta modela y ta den exterior, mientras cu recientemente den nos Hospital aki na Aruba un otro ciudadano ta perde su bida, pa un simpel descuido y falta di atencion. Un situacion alarmante y un tendencia di ultimo añanan cu merece atencion di nos tur y bini cu cambionan fundamental den nos sistema di cuido medico.
Un minister di Finanzas cu te awor parce ta esun di mas malo cu Aruba a conoce desde 1951 tempo cu Aruba tabata forma parti di Antiyas Hulandes. Un minister cu solamente ta tende bisa cu a hereda un desastre, cu cos ta malo, pero cu nos ta riba e bon caminda. Un minister cu a habraca nos confianza, e sistema di belasting y e
servicio di belasting aki na Aruba. Un minister kende, cu aprobacion di Banco Central, gobierno Hulandes en parte y gremionan comercial y algun sindicato, ta fia, fia, y sigi fia placa. Nos partido UPP tin comprendi cu otro aña un otro 500 miyon florin lo bolbe wordo presta, afectando asina nos quota di debe mas aun, y na su turno hincando Aruba den un abismo mas grandi ainda.
Nos por menciona aki tanto e minister di Economia como esun di Labor cu ta responsabel pa e situacion economico y laboral di nos pais. Nos por mira un Valero cu a sera su portanan, y na unda cu na e momento aki
hopi Arubiano ta na cas. Nan ta permiti di un banda pa minister di Husticia destabilisa e control di nos fronteranan pa evita cu mas hende ta bin Aruba, y di otro banda nan ta permiti pa Minister di Inmigracion sigui laga hende drenta, sigui duna permiso, sigui prolonga estadia aki na Aruba di supuesto vacacionistanan, pero cu en realidad ta traha nan ta bin traha aki na Aruba. Y esaki sin ningun tipo di screening, cu tin como consequencia cu hopi criminal y cu hopi hende cu enfermedadnan contagioso, ta drenta nos pais libremente.
Al final nos por menciona Minister Presidente himself cu ta e culpable mayor di tur e situacion penoso cu Aruba ta aden. Un Minister Presidente cu ta eherce e politica di avestruz, hincando su cabes den tera ora cu tin problema aki na Aruba, y cu su unico meta ta pa halsa su mes como "estadista", cambiando historia di Aruba, secuestrando
logronan di Sr. Betico Croes en feliz memoria. Un minister cu ta ora tin cos di show so bo ta wak su cara. Show cu "Green-energy", cu "Green conference", cu biahenan rond mundo y, si ta posibel den sombra di ministernan Hulandes of miembronan di Casa Real. Un minister cu tin biaha ta duna bo e gevoel cu algo no ta bon cu ne y ta actua mescos cu e ta di "Blauw Bloed".
Partido UPP por mira back pues riba un periodo di deterioro tanto riba tereno gubernamental, como den nos parlamento, unda e nivel y e efectividad ta hopi abou mes. Mientras cu tin hopi asuntonan importante pa trata, manera e proyecto di Urirama, parlamento ta haya ley di cacho mas importante.
Aña 2013 sigur ta bai bira un aña mas dificil aun. Nos ta pidi pueblo pa ta alerto, ya cu e aña cu ta bin ta aña di eleccion y e partido na mando hunto cu e prensa comprometi, lo trata di pinta e situacion bunita, pa asina por gana eleccion.
UPP ta pidi pueblo pa ta hopi conciente den 2013, y no permiti di wordo hiba pa, y engaña cu cosnan bunita, ya cu esey lo ta temporal. Pueblo di Aruba mester mira bon e aña cu ta bin pa e no wordo manipula, manera a sosode e siman aki ora Mike Eman como Minister Presidente ta pega sticker riba autonan di "Green Aruba 2013".
E manipulacion a cuminsa caba, pasobra ta wordo bisa cu ta un acto di concientisacion, pasobra 2013 lo bai enfoca riba e parti Green. Pero nos tur sa cu ta aña di eleccion y nos tur sa ta cua color e partido na mando tin.
Si na 2013 pueblo kier caba cu tur e bagamunderia aki, e deroche di placa y e manipulacion aki, anto UPP ta un alternativa serio den esaki.
Mahatma Gandhi a yega di bisa: "the future depends on what we do in the present"! Pues nos futuro ta depende di kiko nos ta hasi awe!
Esaki kiermeen nos futuro ta den man di nos pueblo y ki decision e bai tuma den e proximo eleccion.
Cu esaki den mente nos mester drenta e aña 2013 cu tur confianza y sin miedo.
Aña 2013 lo ta e aña den cual nos partido – unista, patriotico y progresista – lo bai demonstra cu e ta un partido diferente na otro partidonan; nos partido lo t’ey pa sirbi solamente e interes di e Pueblo Arubano, y cla pa sirbi e pueblo cu FE den nos Creador y cu e speranza den progreso di "Nos Patria".
“Nos Patria”, no solamente un dicho, pero É consenshi di nos tur. “Nos Patria”, cu ta e fundeshi pa e progreso di Aruba, unda nos idioma Papiamento, cultura y balornan lo ta e base di e progreso aki, y unda lo no tin lugar pa miedo, ni distincion di sexo, raza, credo, of descendencia, garantizando asina ey oportunidad pa un y tur.
Den nomber di Union Patriotico Progresista – U.P.P., tambe den nomber di su famia, Bo humilde sirbidor, Candelario-Booshi-Wever, kier desea pueblo henter un feliz y prospero aña 2013.
 |
Mustra/Kita e formulario di comentario
e ex-compinche di Booshi wever esta, Edy briesen
dilanti huez pa duna cuenta di su fechorianan. E turno
di Booshi Wever lo yega mas tempran cu laat...!!! Hopi
confianza y sin miedo...!!!!