Parlamento Hubenil un biaha mas a yama un aña exitoso cu yen projecto positivo ayo, esta aña 2012

Friday, 28 December 2012 17:57

Asocacion Conseho Hubenil Aruba a celebra nan cena di Pasco na restaurant El Farro Blanco. E bunita cena di Pasco aki a wordo organisa dor di Comision Eventonan Social cu a organisa un bunita cena yena cu memoria y momentonan inolvidabel cu miembronan di Asociacion Conseho Hubenil Aruba (A.C.H.A) hunto cu Fundacion Parlamento Hubenil Aruba (F.P.H.A) a goza di dje. E comision Eventonan Social a sali e comision di aña 2012 E anochi aki a cuminsa cu un palabra di bon bini di Sr. Lorenzo Dirksz y Sra. Daniela Hernandez cu tawata e MC pa e anochi aki. Nan a yama tur persona bon bini y asina a sigui dibiaha cu un speech di A.C.H.A su presidente, Sr. Rigmar Kock. Rigmar a yama danki na un aña yena cu hopi eventonan tanto formal y social, tambe a papia di tur e projectonan venidero y a duna su palabra di suerte y deseonan na tanto e miembronan di A.C.H.A y F.P.H.A. Despues di e palabranan sentimental y emocional cu recuerdo di presidente di A.C.H.A, e anochi a sigui dibiaha na un splicacion di un wega atractivo cu Comision Eventonan Social a prepara pa e anochi aki. Na final di e anochi, Sra. Edith Conde Blanco a sa di a gana y a ricibi un premio atractivo for di F.P.H.A. Manera tur aña, A.C.H.A su directora, Sra. Vicky Tromp-Croes, ta haci un momento hopi special pa tur miembro di A.C.H.A, cual ta e momento di reflecion. E momento aki tawata pa asina e miembronan por pensa di e cosnan malo y bon cu a pasa den aña 2012 y kico nan lo kier drecha y haci mihor pa aña 2013, e miembronan a pensa di nan logronan y locual ainda nan kier logra pa nan mesun futuro como persona tanto profesional y personal. Ariba e anochi aki tambe A.C.H.A a huramenta dos miembro cual ta Sra. Jovianka Ridderstaat y Sra. Jurney Tromp. Manera semper e dos hobennan aki a sa di a pasa den e proceso pa bira miembro oficial di A.C.H.A y pa e motibo aki a wordo huramenta e anochi aki. Tambe A.C.H.A a dicidi di haci Sra. Leanne Geerman un Erelid di A.C.H.A, Erelid kermen cu e persona aki lo ta un miembro pa henter su bida. Sra. Leanne Geerman a sa di demostra su pasion y determinacion den su 4 aña cu e tin den A.C.H.A y pa e motibo aki a wordo nombra un Erelid di Parlamento Hubenil. Ariba e anochi aki manera tur aña a saca e 10 miembronan mas activo pa aña 2012, cual e puesto di prome lugar a keda den man di Sra. Aïshyta Sichtman. Fundacion Parlamento Hubenil kier a desea henter e comunidad di Aruba un feliz aña nobo. Tambe Asociacion Conseho Hubenil Aruba kier a recorda tur hoben pa sigui cu e bon trabou y sigui den e bon caminda, corda cu e hobennan di awe ta e lidernan di mañan!