| Minister dr. Richard Visser: Aruba tin basta ambulance cu personal bon cualifica |
 |
 |
| Friday, 28 December 2012 15:10 | |||||||||
 Aruba por ta orguyoso di su servicio di ambulance, Minister di Salubridad y Deporte, dr. Richard Visser a yega di bisa na mas di un ocasion, splicando cu e personal di ambulance a haya training extensivo y ta esun mas cualifica entre islanan den nos region. Ademas, awo e personal tin bastante material, incluyendo shete (7) vehiculo na nan disposicion.
Bispo di Pasco e dos ambulancenan transitorio cu a yega di Hulanda a wordo poni den servicio y tin dos mas ta bin pa nos isla den futuro cercano, Minister Visser a splica. Tin basta ambulance y ta di importancia pa nan funciona pa transporta hende, pero loke ta mas importante ta e hendenan cu ta traha den e vehiculonan, Minister Visser a subraya. Ta pa prome biaha cu e personal di ambulance na Aruba tin cualificacion asina halto, el a bisa. Loke ta haci e diferencia grandi y ta un factor esencial pa salba bida segun e mandatario, ta cu e enfermeronan di ambulance a sigui un curso extenso di un aña y mey pa asina nan ta cualifica pa cuminsa trata e pashent den ambulance mes, na caminda pa hospital. Antes esaki no tabata e caso y ayudo basico so tabata por wordo duna. Recientemente tambe e chauffeurnan di ambulance a ricibi un curso special y asina servicio di ambulance na Aruba a ricibi un bon upgrading, cual e staf y personal a keda hopi satisfecho cun'e y ta orguyoso di e servicionan extra cu nan ta capacita pa brinda awo. Na e nivel cu nan ta awo, entre islanan den nos region, nan ta "top", Minister Visser a bisa enfaticamente. Enfermero Junior Rivero ta añadi cu pa yuda e servicio di ambulance funciona optimalmente ora di duna asistencia, por fabor duna 911 mas informacion posibel tocante e estado di e pashent. Asina esun cu contesta y tuma informacion na 911 por duna esun cu ta yamando of e pashent mes informacion corecto pa loke ta trata kico pa haci y tambe lo tin bastante dato pa duna e personal di ambulance. Tin diferente tipo y nivel di emergencia y ta importante pa ambulance por duna asistencia di acuerdo cu e necesidad. Sr. Rivero ta splica cu entre otro casonan di pashent cu no ta hala rosea of tin dificultad pa hala rosea, pashent cu no tin pulso, pashent cu ta sangra hopi y personanan envolvi den accidente pisa ta casonan di un grado di emergencia sumamente halto y ta poni halto ariba lista di prioridad pa duna asistencia den 15 minuut. Casonan cu hopi biaha, pero no tur ora, pero por ta di menos emergencia por ehempel ta: sacamento, diarea, dolor di orea of un persona cu tin keintura pa dos dia caba. Esakinan mayoria biaha ta casonan di urgencia y no di emergencia. E pashentnan aki ta wordo atendi tambe pa ambulance, pero esaki ta depende di e caso di gravedad y si e pashent no tin un famia, amigo of conoci cu por yuda e pashent yega dokter di cas na warda of spoedeisende hulp. Sr. Rivero ta splica cu den mayoria caso ta mas eficiente pa e pashent aki, si ta posibel, bay e dokter di cas na warda of spoedeisende hulp acompaña pa un persona di cas. Ta importante pa nos comunidad ta consciente cu un emergencia y urgencia no ta mescos. P'esey ora di yega na spoedeisende hulp enfermeronan ta haci "triage". Esaki ta encera cu e casonan di emergencia ta drenta prome y otro pashentnan mester warda. Ta bon pa tuma nota cu durante dianan di fiesta si un persona bira malo tambe tin servicio di doctor di cas na warda na disposicion di e pashent. Tin un doctor na warda tanto pa p'ariba como p'abao di brug y e oficinanan ta ubica den cercania di Horacio Oduber Hospital y IMSAN. Ta hopi incomodo pa sinta warda na Eerste Hulp, ya sea p'ariba of p'abou di brug pa oranan largo, tanten cu tin servicio di doctor na warda tambe disponibel. Ta consehabel, particularmente si tin yiu chikito y hende grandi den famia pa percura di ta na altura cua doctornan y boticanan ta na warda. Minister Visser y e Team di Ambulance ta spera cu e incidentenan lo ta minimal y ta desea pa comunidad di Aruba celebra e ultimo dianan di aña y cuminsamento di 2013 den bon salud.
Comentarionan (5)Mustra/Kita comentarionan ...
Rod
1. Mi no ta mara na ningun partido. Mi ta prefera pensa pa mi mes. 2. Visser twt tremendo. Den 4 anja ela participa cu hopi caminata. 3. O ja i hospital nobo no ta bai door. 4. Mi no ta MEP, pero alomenos Booshi a trece un centro medico na San Nicolas, hopi mas cu Visser a hasi.
,
December 29, 2012
Duna Comentario y/of Comparti riba Social Medi |
Mustra/Kita e formulario di comentario
