Val Peterson tocante renobacion di CB Lago Heights: "The nightmare is over!"

Friday, 28 December 2012 13:44

Como miembro di directiva di Centro di Bario Lago Heights encarga cu e programa di baseball, Val Peterson ta sumamente contento como cu Minister di Deporte, Dr. Richard Visser a haci inicio di e trabao di construccion y renobacion di e centro e siman aki.

Sr. Peterson a expresa cu un alivio grandi, "The nightmare is over!" y porfin e baseball lo por conoce un desaroyo grandi atrobe na San Nicolas pasobra lo tin facilidadnan apto disponibel atrobe.

Deporte di baseball a bay atras na San Nicolas den e ultimo shete añanan, Joe Laveist Ballpark ta practicamente cera y generalmente facilidadnan deportivo ta den mal condicion, consecuentemente e boluntarionan ta desanima y e muchanan no tin un role model positivo den e deporte aki na San Nicolas, Sr. Peterson a bisa, resumiendo e "nightmare" cu nan a pasa aden.

Cu un inversion di mas di 400 mil florin, e siman aki e renobacion y construccion a cuminsa na Centro di Bario Lago Heights, unda cu Minister Visser y su team, hunto cu Minister di Finansa Mike de Meza, ta percurando pa un hoya di facilidad deportivo. E veld di bala mes ta wordo renoba por completo y cera cu muraya pa siguridad di e muchanan, lo construi "dug out" y tribuna, lo instala score boards. Ministernan Visser y De Meza ta percurando asina pa un facilidad fabuloso unda cu trainers, hungadonan y fanaticada lo reuni y conoce crecemento y desaroyo den baseball na San Nicolas un biaha mas.

Sr. Peterson ta splica cu awendia asina mes cu e facilidad ta deteriora, boluntarionan ta sigui padilanti, aunke con dificil e situacion di training ta. Entre 60 pa 80 mucha ta train ariba e veld y nan ta purba di motiva tur dia mas mucha cu ta biba den e bario pa bin train. Tin tres team; uno di 5 pa 6 aña, uno di 7 pa 8 aña y uno di 9 pa 10 aña ta train ariba e veld aki, Presidente di White Sharks, Raymond Kamperveen ta splica. Ademas tin un team di hoben mas bieu tambe ta train tur dialuna na Lago Heights, e ta añadi.

Segun Sr. Kamperveen ta splica, e muchanan y hobennan cu ta train ariba e veld awendia lo ta e role modelnan pa e generacion cu ta bin.

Sr. Peterson a subraya cu boluntarionan ta haci un trabao impagabel cu curason pa e muchanan y deporte, pero nan mester tambe facilidadnan apto pa por traha cu placer. Ademas, Sr. Peterson ta enfatisa cu un bon facilidad tambe ta atrae fanaticada y particularmente mayornan y mas boluntario, como tambe ta trece cun'e motivacion pa haci mas contribucion cu fundraising y actividadnan pa e hobennan y e bario.

E ta splica cu e renobacion y construccion di na Centro di Bario Lago Heights no solamente ta importante pa e deporte, pero pa e comunidad y lo trece cun'e un cambio di mentalidad cual ta beneficia e hobennan y desaroyo di deporte.

"Mi ta masha contento y hopi gradicido. Al final 'the nightmare is over'", Sr. Peterson a conclui bisando.