Un total di 32 container di klapchi a wordo reparti diaranson mainta

Thursday, 27 December 2012 21:59

Diahuebs mainta trempan a cuminsa cu reparticion di 32 container di clapchi tur rond di nos isla. E aña aki tin menos punto di benta compara cu aña pasa. Aruba a haya 16 container di klapchi fresco e aña aki. Orario di benta ta entrante diaranson, 27 di december, te cu 31 di december, for di salida di solo te cu 9or di anochi.

E controlnan di polis, DOW, DTI y bomberonan lo tey durante e dianan nos dilanti. Den entrevista cu Rubin Ponson experto di explosivo na DOW el a splica kico tur a wordo haci diaranson mainta caba. E ta e mesun sistema cu a wordo uza aña pasa, sacando e containernan den oranan di manera cu ta brinda mas seguridad ya cu tin menos trafico. E prome lote a sali ya caba rond di 5’or di madruga. Segun Ponson a splica, tin 32 container na Wela cu mester wordo saca y den e prome salida a logra saca 10 container. Tin 16 container nobo a yega, cu na momento di nan yegada ya caba a wordo reparti caba den e diferente containernan cu nan mester wordo poni cu a haci e trabou di diaranson madruga mas facil. E sistema aki a wordo introduci rond di tres aña pasa. Antes tabata hiba e container cu klapchi na e luga di benta, unda cu funcionarionan di Aduana ta bay haci e controlnan. Cu e sistema nobo, nan ta sali cla for di Wela pa bay na e puntonan di benta. Di antemano, autoridadnan concerni a controla e chassis y trucknan cu ta bay lastra e containernan, cu ta otro aspecto cu ta haci e trabou di entrega di material mas eficiente. Ponson a splica cu asina cu a caba di saca tur container diaranson den oranan di mainta, e comision a cuminsa cu control na e puntonan di benta pa mira si nan ta cumpli cu tur e condicionnan. Algun di e condicionnan por ehempel ta e cantidad di clapchi cu por tin den e parti unda e benta ta tuma luga, ta chek si berdaderamente e clapchinan cu tin eyden, ta esnan cu e comision a controla caba, y ta wak tambe nan aña di produccion (cu tambe ta wordo specifica den e condicionnan). Manera menciona, tin menos cantidad di clapchi cu a wordo importa e aña’ki, pero tambe e puntonan di venta ta menos. Aña pasa tabatin mas cu 80 punto di venta, mientras cu e aña’ki el a baha pa 68. Ponson a splica cu nan tin un comision trahando riba e control. No ta logra controla tur e negoshinan pero si tin suficiente persona cu ta acudi na e diferente luganan riba cual ta drenta tip cu nan no ta cumpli cu condicionnan. Y naturalmente ta tira nan spot checknan.