| Inspector Ricardo Muller: Ta bay uza luz di trafico y algun hefboom pa tram |
 |
 |
| Thursday, 27 December 2012 21:03 |
|
Muller a splica cu algun aña pasa caba a cuminsa reuni den comision di trafico hunto cu e departamentonan concerni di Gobierno riba loke mester bin na regla pa tram, den e ley di trafico. Den e caso aki, el a tarda comokiera cu e ta algo cu no conoce prome na Aruba, pa cual mester a studia tur detaye bon y bini cu reglanan pa asina e chens cu tin accidente cu e tram ta minimo. Pero tambe mester a inclui den e ley un tipo di luz di trafico diferente na esun cu nos ta custumbra cune. E postenan di e dos luznan ta hopi mas abou y tambe mester pone borchinan. E postenan di luz ta bay destaho publico bek, pasobra e prome biaha e no a bay bon. Loke chauffeurnan mester tene cuenta cune ta cu semper e tram tin preferencia riba otro trafico riba su ruta. Pesey e tres biahanan cu e tram a core, semper tabata tin Polis presente pa controla e trafico. E tram lo por cuminsa core na luna di januari, ora cu e ley ta cla, y luz y borchinan ta poni. Mientrastanto e concepto di ley, cu ta wordo yama “Spoorwegen Verordening” ta cla y ta na Raad van Advies. Den un entrevista cu inspector di polis Ricardo Muller hefe tambe di departamento di trafico a puntre riba e leynan cu mester keda aproba pa tram por cuminsa core. El a splica cu no sa ainda si e reglanan di trafico pa e tram ta bay Parlamento. Si e wordo hinca den un landsverordening, e mester bay Parlamento. Mientras cu si ta un landsbesluit e mester wordo aproba door di e departamentonan concerni so. El a splica cu for di landsverordening di trafico, por saca un landsbesluit cu ta atende cu e reglanan pa cu tram. Tur cos ta depende di kico Gobierno y instancianan dicidi. Inspector Muller a splica cu inicialmente a pensa pa cera cierto cayanan, uzando hefboom, pero finalmente a opta pa no haci esey, y uza luznan di trafico. Na algun luga specifico lo pone hefboom manera den Schelpstraat, caminda mainta tempran e ta wordo poni, ya cu e area aki ta hopi smal. Hopi biaha ta haya autonan staciona na banda drechi di e caya, cu ta haci imposibel pa e tram pasa. Na inicio di Caya Betico Croes, banda di La Linda, lo tin un hefboom. Mainta tempran ta baha e hefboom pa trafico no pasa y anochi 7’or ta lante, permitiedo trafico pasa normal bek. A uza e skinanan aki pa pone hefboom pa autonan manera di Polis, Ambulance y Brandweer por pasa na momento di emergencia toch. |
Mustra/Kita e formulario di comentario
