| Inspector Ricardo Muller: Tin un motociclista grave despues di accidente |
 |
 |
| Thursday, 27 December 2012 21:44 |
|
Diahuebs madruga tabatin un accidente basta grave cu a tuma luga un poco pabou di Bushiri hotel ora cu un motociclista a perde control riba su vehiculo, cual tabata un brommer Harley Davidson. Den combersacion cu Ricardo Muller, Inspector di Polis kende a bay na e sitio di e sucedido, el a splica cu e hecho a sosode despues di 2’or di madruga. Ta parce cu e tabata bayendo direccion di Sasaki y tabatin un amigo cu tabata biniendo su tras. E amigo a declara cu dado momento el a cuminsa pit’e pasobra el a nota cu e brommer tabata bayendo na su banda robez. E no por a reacciona mesora y e Harley a dal den e acera causando cu manehador a wordo tira na suela y e brommer mes a bay keda na cierto distancia, totalmente destrui. Autoridadnan policial despues a haya informacion cu e persona aki ta basta grave, a haya hopi sla y a keda interna den cuido intensivo. Den e caso aki no tabatin ningun otro vehiculo envolvi pero asina mes Polis ta investigando kico a causa cu el a haya su mes envolvi den e accidente aki. Loke autoridadnan a compronde, el a caba di sali di un fiesta y tabata bayendo un otro sitio. Ta parce cu e manehado no a nota e birada di e caminda. Inspector Muller a haci un apelacion na tur cu ta move riba caminda, no bebe y sinta tras di stuur, respeta ley di trafico y principalmente baha velocidad, pa por finalisa aña trankil y habri 2013 bon tambe. Principalmente cu menos accidente. |
Mustra/Kita e formulario di comentario
