Minister di Infrastructura Benny Sevinger ta masha orguyoso di e spiraal rotonde. E ta un proyecto cu a wordo diseña, a bay destaho publico, ehecuta y entrega den e mesun aña. “ Sevinger na apertura di spiraal rotonde diabierna mainta tempran a bisa cu e ta un proyecto masha importante ya cu e ta conecta cu e ringweg di Avenida Watty Vos cu ta bay direccion di hotelnan y tambe cu e Green Corridor cu ta bay direccion di San Nicolas. Spiraal Rotonde ta bay combina e dos proyectonan cu otro. Mirando cu e Green Corridor ta bay tuma mas tempo pa e wordo ehecuta, Gobierno a dicidi pa cuminsa cu e spiraal rotonde, pa yuda den e fluho di trafico. El a wordo ehecuta cu placa cu a wordo aproba door di Parlamento di Aruba y a costa rond di 7 miyon florin. Minister Sevinger a gradici DOW y MNO Vervat cu a logra wanta e proyecto den e presupuesto poni y den e time-frame. “Awe ta un dia importante. Nos a cumpli cu un proyecto y cu e meta di trece e conexion entre Ostad y San Nicolas, y trece seguridad riba e crusada aki. E solucion cu a bin cune, ta alivia e fluho di trafico y ta trece seguridad.” Den e proyecto a tene cu tecnologia berde, caminda cu a usa LED lights. E spiraal rotonde te ainda no a haya nomber, manera por ehempel Rotonde Las Americas. Pero, segun Minister Sevinger, aeropuerto y ATA a tuma na nan encargo e embeyecimento di e rotonde aki, cu ta e prome cu e turista ta keda confronta cune ora cu e yega Aruba. Lo bay instala 33 bandera for di unda e turistanan cu ta bishita Aruba ta procedente y e palabra WELCOME lo wordo poni grandi riba e rotonde. Kizas, e mandatario ta pensa, e lo por bira Welcome Rotonde. Pero den su construccion el a wordo yama un spiraal rotonde, ya cu e flechanan na suela y e borchinan ta indicabo unda bo tin cu bay y e mes ta sacabo afo.

Comentarionan (0)

Mustra/Kita comentarionan

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi