| Prome Minister Mike Eman: Apoyo den comunidad ta creciendo pa minuut |
 |
 |
| Wednesday, 19 December 2012 20:11 | ||||||
|
Magnitud di e logro tabata visibel den cara di e grupo di trahado di contratista, ingenieronan di DOW, y comerciante y ciudadanonan cu casualmente tabata presente pa experiencia e momento special. Hendenan a sali di nan cas, negoshi y oficina y te hasta para auto pa wak e tram pasa. “E intencion tabata pa haci e test laat pa ta mas trankil, pero e tram ta hala hopi atencion y simpatia,” Premier Eman a indica. “Tin un entusiasmo grandi pa algo di tanto importancia y cu ta bira parti di nan caya grandi.” Hunto cu e renobacion di Caya G.F. (Betico) Croes, finalmente tin muestra palpabel di e vision di Gabinete Mike Eman pa un Oranjestad nobo, mas bunita, mas moderno, pero principalmente mas beneficioso pa e comerciantenan, pa e bishitantenan y pa e pueblo di Aruba. “Gobierno a insisti riba su vision. Tabatin hopi critica, pero awe mas y mas di nos ciudadanonan ta hayando un entusiasmo hopi grandi,” Prome Minister a bisa. E streetcar a sali for di e remise riba tereno di waf y den Schelpstraat a haci testnan di brake mientras cu net prome cu edificio di Nicky Habibe tambe a haci testnan di velocidad pa tuma bocht, etc. “Nos tin persona di HTM hunto cu e compania Mericano ta haciendo tur e trabou di revision y ahuste, percurando pa e siguridad di tur e pasaheronan abordo di e tram,” Prome Minister a indica. Diasabra mainta pa 10 or lo tin un ceremonia special di introduccion na cual henter comunidad di Aruba ta invita pa presencia e momento special aki. Tur hende lo tin chens di wak e streetcar di cerca, subi y core den dje. “Diasabra e ta henter dia den caya,” Premier Eman a bisa indicando cu lo ta bou vigilancia di Polis den trafico ya cu ta falta algun aspecto di siguridad den infrastructura cu pronto lo keda instala. No tin duda den mente di nos Prome Minister ni di su Gabinete cu a tuma e paso corecto pa garantisa revitalisacion di centro di ciudad y hib’e bek den su era di gloria, si no ta inicio di un era miho. E invitacion ta pa henter pueblo di Aruba bin diasabra mainta den caya grandi y celebra e logro aki cu ta di Aruba completo.
Comentarionan (7)Mustra/Kita comentarionan ...
Si claro...hopi apoyo bo lo hanja di nos. Nos tur ta cla pa BUKS boso den 2013. Yega! Regime Eman
,
December 19, 2012
...
Comunidad ta cla pa mira mas cu 40 millon florin arubiano cu a worde benta afo, ora e TRAM pasa ariba e heronan den caminda! Un berguenza di Proyecto cu ta MUESTRA cu nos GOBERNANTENAN no tin un tiki idea di PROJECT MANAGEMENT, No tin un Lista di PRIORIDAD y ta GOBERNA AD HOC, malgastando placa cu nos ta paga tur luna na SIAD, pa medio di BELASTING!
,
December 20, 2012
...
PabienPueblo di Aruba, nos a hanja un bunitesa di caya grandi, e mas bunita den caribe...we r blessed
,
December 20, 2012
Duna Comentario y/of Comparti riba Social Medi |
Mustra/Kita e formulario di comentario
