Wednesday, 22 October 2014
Prome grupo di hoben di Formacion Social a termina nan trayecto exitosamente Print E-mail
Thursday, 29 November 2012 20:20

formacion

Den Fort Zoutman e ceremonia di entrega di certificado na e prome grupo di hoben di Formacion Social cu un aña pasa a cuminsa cu e trayecto aki, a tuma luga. Esaki den presencia di e persona cu tabatin e vision pa inicia cu e proyecto aki Prome Minister Mike Eman, Comandante di Marina Real Hofma, Capitan Cedrick Werleman, miembro di Parlamento Rene Herde, representantenan di VNO, Jessy Ras kende hunto cu Omar Harms ta guia e proyecto, cabesante y educadornan di ‘Enseñansa pa Empleo’, miembronan di Marina Real, demas invitadonan y mayornan orguyoso.

E invitadonan di honor, shete di e nuebe hobennan cu a termina e trayecto cu exito, a sinta dilanti cu nan uniform bisti. E excelente proyecto aki a haya su merecido atencion na momento cu hunto tur presente a lanta para y aplaudi e hobennan y nan mayornan cu nan logro. Noahmi Peterson a resalta pa su prestacion y a haya un plakkaat y un regalo como muestra di aprecio. Mester bisa cu e aire di positivismo tabata supla for di tur angulo den e luga historico di Fort Zoutman. Tur cu a papia a accentua cu awor ta keda na e hobennan pa sigui cana e caminda di exito riba cua nan a dal e prome paso un aña pasa. Nan perseverancia a pone nan yega unda nan ta awe. Jessy Ras “Mi ta desea boso hopi exito den boso futuro carera”. Gregory Koolman di Enseñansa a papia di un di dos oportunidad y cu nos mester kere den esey. Hofma a califica e ceremonia como un momento special.” Capitan Werleman a bisa di ta orguyoso di e hobennan. “Nos a yuda, pero ta boso a haci’e”. Prome Minister Mike Eman tabata un homber satisfecho. El a mira su soño bira realidad y su vision cumpli. Hopi tabata e trabounan cu a wordo haci, pero despues di hopi discusion, surpasa obstaculonan, e ley a yega Parlamento na unda unanimamente el a keda aproba. “Cu entrega di e certificadonan na e hobennan aki nan a yega na un momento hopi importante den nan bida. Si pa cualkier motibo tabatin un momento cu boso a cay atras den bida, awe cu satisfaccion grandi mi por bisa cu nos no a laga boso atras”. Despues di un pelicula cortico a sigui entrega di e certificadonan na e hobennan dor di Prome Minister Eman, hunto cu Jessy Ras. Un brindis modesto a sigui despues pa tur presente celebra hunto cu e hobennan cu nan a logra loke un aña pasa nan a pone nan dilanti.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter