Monday, 20 October 2014
Instancianan y cifranan ta demostra continuamente e desaroyo positivo den turismo di Aruba Print E-mail
Thursday, 29 November 2012 19:03

Otmar Oduber017
Diahuebs mainta Minister Otmar Oduber tabatin un encuentro cu prensa caminda el a elabora riba diferente tema. Un di nan tabata su reaccion pa loke ta trata e comentarionan di lider di oposicion, Evelyn Wever-Croes relaciona cu desaroyo den turismo. Diferente instancia y cifranan ta demostra continuamente e desaroyo positivo den turismo di Aruba, pero lider di oposicion, sea pa ignorancia of maldad ta papia di preocupacion den e sector.

Manera ta conoci, ta hopi noticia positivo pa cu nos turismo ta bin dilanti practicamente tur dia, incluyendo datonan for di Banco Central cu ta indica cu e tourism receipt, esta e placa cu turistanan ta laga atras den economia di Aruba, a conoce un subida den e promer kwartal di 6.1% y average den e promer 6 lunanan di 3.7%. E mandatario a indica cu e no por compronde e actitud, pensamento, ignorancia of maldad di parti di Sra. Wever-Croes cu ta bin dilanti y bisa cu tin preocupacion pasobra Banco Central lo a mustra riba e hecho cu nos ta creciendo menos den cantidad di hende cu nos tabata crece anteriormente. “Mi no sa si considera esaki un falta di conocemento of si ta intencionalmente e ta bin cu tipo di expresionnan asina”. Aruba ta sigui crece den cantidad di turismo, caminda aña pasa tabatin un crecemento di 5.7% (cual por cierto ta mas halto cu average di crecemento di Caribe y mundo) y e aña aki ta bayendo den direccion cu lo crece riba loke a pronostica como meta, esta 3% y lo cera aña cu un crecemento di alrededor di 3.5%. Contrario na e tendencia actual, na momento cu Minister Otmar Oduber a asumi responsabilidad tabatin caida den turismo, caida den entrada di turista y un concepto di relacionnan cu partnernan den exterior deficiente. “Awe e critica di oposicion ta cu nan kier pa nos crece mas cu loke nos a crece aña pasa, pero si no tin mas hotel y a scohe, manera e Gobierno aki a scohe pa no tin un cantidad considerabel pa loke ta crecemento den cambernan, ta imposibel pa bo sigui crece na e velocidad cu bo tabata creciendo pasobra simplemente no tin camber”, Minister Oduber a duna di conoce. Dunando un ehempel di e situacion, el a menciona cu na december awor tin dos siman cu no por bende ni un camber mas. Durante e simannan di Pasco y aña nobo Aruba ta sold out. Tambe pa loke ta januari y februari tambe tin 4 siman caminda cu nos isla ta completamente bendi. Mustrando con yen e hotelnan ta, Minister di Turismo a bisa cu na e momentonan aki ta mirando e diferente posibilidadnan pasobra no por haya ni un camber adicional pa e vuelonan cu ta inicia for di Brasil na december. Pa tal motibo e ta bisa cu e problema cu tin na e momentonan aki ta un problema di luho caminda cu tin aerolinea, avion y vuelo directo y pa dos siman no tin camber, pero cu ta trahando si pa resolve e problema di luho aki. E declaracionnan aki di Minister Oduber ta demostra e mentalidad ‘mezquino’ di purba crea algo negativo, hasta trociendo palabranan di Banco Central cu a mustra cu a pesar di e ciere di e refineria cu a para na maart practicamente su actividadnan na Aruba, tin un crecemento di casi 6% den economia di Aruba. E mesun Banco Central aki ta duna tur e credito di e crecemento aki na e crecemento continuo den cantidad y calidad di turista na Aruba, combina cu inversionnan den infrastructura. “Mi lo lague pa loke e ta den e caso aki, mi ta kere cu nan tin problema mucho mas serio pa atende cune den nan partido, particularmente si mira e ultimo acontecemento y ultimo veredictonan cu a sali e siman aki for di huez”, Minister Otmar Oduber a finaliza bisando.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter