Ta solamente posibel pa paga y busca plachi di number si e adres di cliente ta corectamente registra na Servicio di Impuesto. Pa busca e plachinan di number ta necesario pa presenta e prueba di pago y e prueba di seguro valido. E seguro mester ta valido entrante 3 di januari 2013. Pa aña 2013 e color di e plachinan di number ta fondo oranje cu letter y/of cifra blanco. Adres corecto Ta solamente posibel pa paga y busca plach’i number si e adres di cliente ta corectamente registra na Servicio di Impuesto. Si e cliente no sa si su adres ta registra corectamente, e por yama telefon 522-7423 ext. 679, 686 of 713. Pa registra e adres e cliente mester yena un formulario. Persona particular ta yena e formulario ‘Opgaaf persoonsgegevens particulieren’. Pa empresa mester yena e formulario ‘Opgaaf of wijziging adres & telefoon bedrijven’. Alabes mester agrega un copia di cedula, rijbewijs of paspoort na e formulario. Pa empresa mester pone tambe acerca e comprobante di registracion na Camara di Comercio. E formularionan menciona ta disponibel tambe riba www.siad.aw. Despues ta entrega e documentonan na Servicio di Impuesto sea na Camacuri of na Oficina di gobierno na San Nicolas. Haci pago na Servicio di Impuesto E cliente cu ta desea di paga na Servicio di Impuesto por haci esaki sea na oficina principal na Camacuri of na un di e oficinanan di gobierno na San Nicolas, Santa Cruz, Savaneta of Paradera. Con por haci pago? Cliente por paga sea cu placa cash, ‘debit card’ (maestro), bankcheque of kassiercheque.

Tene cuenta cu pa impuesto di vehiculo di motor no ta posibel pa paga cu cheque personal. Rekisitonan ora di haci pago Pa haci e servicio mas eficiente y lihe, ta pidi e clientenan pa no lubida di trece:
1. Prueba di registro di e vehiculo di Servicio di Impuesto.
2. Recibonan di pago di aña 2012.
3. Permiso valido pa plachi B, TX, V, O y T.
E clientenan cu ainda debe impuesto di aña 2012 lo mester caba di paga esaki prome cu paga e impuesto di aña 2013. Pa plachi di number cu ta exigi un permiso (vergunning) manera bus, taxi, v-auto, plachi ‘O’ y ‘T’, por haci pago unicamente na e oficinanan di Servicio di Impuesto. Esaki ta pa motibo cu mester controla si e permiso ta valido na momento di haci pago. Si e permiso no ta valido e
cliente no por paga e impuesto. Den un caso asina e cliente mester regla su permiso na DOPV prome. Pago via banco Cliente por haci pago via banco tambe. Den e caso aki e siguiente condicionnan ta aplicabel. 1. Cliente ta paga unicamente e impuesto di aña 2013. No ta permiti pa paga e impuesto di dos of mas aña fiscal den un solo transaccion. 2. Cliente mester paga e impuesto y e gastonan di plachi di ful aña 2013. No por haci pago pa solamente un of mas kwartaal di aña 2013. 3.

Cliente mester tin e impuesto di aña 2012 completamente paga. Si ainda no a caba di paga pa aña 2012, e ora mester acudi na Servicio di Impuesto pa haci pago. 4. Pa plachi cu ta exigi un permiso (B-TX-T-O-V) no ta posibel pa haci pago via banco. 5. No ta permiti pa paga e impuesto di dos of mas number den un solo transaccion. 6. Pa esnan cu ta paga via internet, mester tene cuenta cu e opcion di pago via ‘bill payment’ no ta posibel. Si ta posibel pa haci transferencia (funds transfer) pa cuenta di Servicio di Impuesto cu e descripcion menciona akibou. Na momento di haci pago online ta sigui e siguiente pasonan. PASO 1 Prepara e siguiente informacion:
1. Number di registro (persoonsnummer)
2. Number di plachi
PASO 2 Scoge opcion di transferencia
PASO 3 Den e hoki di descripcion ta yena:
Persoonsnummer – plachi di number – periodo di pago
Ehempel: 1234567 – A 1327 – voljaar 2013
PASO 4 Yena e suma total di impuesto
E suma total di impuesto ta consisti di e tarifa di impuesto di ful e aña mas
Afl. 20,- di gasto di e plachinan.
E suma di impuesto ta para riba e formulario di registracion. Si e suma di impuesto ta Afl. 300,-, e ora e suma total di pago ta Afl. 320,- (300,- + 20,-). Nota: si e cliente no paga e gasto di e plachinan (Afl. 20,-), e no por haya su plachinan. Busca plach’i number y seguro valido Entrante 3 di december 2012 cliente por busca su plachinan di number na e local den e edificio schuin dilanti di e oficina principal na Camacuri.

No mester lubida di trece e recibo di pago of printout di pago di internet y e prueba original di seguro valido (polisa). Si bin cu un copia mes esaki mester tin un stempel original di e compania di seguro of broker. Tur cliente mester tene na cuenta cu su vehiculo mester ta sigura sino e no por ricibi su plachinan di number. E seguro mester ta valido entrante 3 di januari 2013. Esaki ta nifica cu si e seguro ta caduca prome cu e fecha aki, e cliente no lo ricibi su plachinan. Servicio extra pa pago colectivo Servicio di Impuesto tin un servicio extra pa e empresanan of grupo di persona/colega etc. cu kier paga mas cu 10 plachi di number. E grupo ta colecta e placa hunto cu tur e documentonan necesario y ta apunta un persona kende lo percura pa haci e tramitenan. E persona encarga aki mester acudi na oficina principal na Camacuri, na recepcion, unda e lo haya e guia necesario. Asina cu caba di registra e pagonan, Servicio di Impuesto lo tuma contacto telefonico cu e persona encarga pa busca e documentonan bek.

Comentarionan (1)

Mustra/Kita comentarionan

...

ki anja ta kita e sistema di paga 4x envez di 2x manera antes.
awor tin hopi hende ta probecha di paga un quartal y no ta paga nada mas y nan ta corre e auto henter anja y tampoco tin nan seguro na orden.
awor aki na fin di november ainda bo ta hanja auto ta corre rond cu solamente e plachi grandi y sin e plachi chikito cu ta indica cu nan a paga full anja

jan croes , November 29, 2012

• 
• +0
• 
• 

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi