E caso di Casibari unda a drenta un cas y apartamentonan patras di cas ta mustra di ta basta serio. Te awor dos detencion tin. Aki ta trata di Lionel Croes y Willys Hernandez.
Fuentenan den Cuerpo Policial ta bisa cu e cantidad di droga ta entre 100 cu 200 kilo di droga. Berdad ora cu e agentenan di droga a sali for di e apartamento, nan a carga dos icejug masha grandi mes cu mester a wordo carga pa dos diferente persona. A pone den baki di pickup. Tambe a confisca mas cos cu tabata den e apartamento y patras di e apartamento. E tabata un bingo grandi segun Polis. Tin diferente version, pero un di nan ta cu a sali den dia mas trempan bay busca droga riba lama. Aki ta caminda a capta e movecion y a prepara pa actua mesora. Esnan cu tin conocimento den e area di droga ta bisa cu tin scarcedad di droga.
Awor cu no tin boto drentando facilmente, ta pone cu embarcacionnan local ta sali topa cu otro embarcacionnan di pazuid y tuma cosnan ilegal over. Den e caso aki droga ta un di e cosan. E modus operandi aki ta bisabo cu tin basta boto cu tabata bin Aruba, tabata trece tambe droga scondi. Kizas arma tambe pasobra Douane a yega di coy esaki. Pesey autoridad mester controla tur e botonan di Aruba cu ta sali bay zuid. E mesun localnan cu diferente biaha tabata bay pazuid pa busca entre otro gasolin, mester wordo vigila pasobra kizas algun di nan ta envolvi tambe awor den otro cosnan ilicito. E detencion di e dos sospechosonan a wordo prolonga. Tanto Lioel Croes cu a keda deteni na entrada di e cas y Willys Hernandez cu ta biba den e apartamento patras di cas mester duna declaracion riba tur loke a wordo haya durante entrada di autoridad.
