Corte Comun di Husticia riba dialuna, 12 di maart, 2018 a declara e homber EJMH liber di asesinato, cometi dia 19 di maart, 2015 na Aruba, unda cu e victima LAW (Lalo) a perde su bida. E sospechoso EJMH dia 10 di mei, 2017 a wordo condena door di Corte di Prome Instancia pa asesinato y a impone un castigo di 20 aña. Den apelacion, Hof a yega na e conclusion cu no tin suficiente prueba pa condena H. pa e asesinato.
Hof a evalua e pruebanan a base di cual Corte di Prome Instancia a condena EJMH di un otro forma. Escencialmente e pruebanan, na opinion di Hof, ta basa riba resultadonan di investigacion haci di DNA y tres combersacion telefonico getal. Tabatin un marca di DNA riba e victima y segun investigacion, esaki cu tur probabilidad tin esun di e sospechoso H.
E tres combersacionnan telefonico, realisa riba e dia di e asesinato, den e investigacion a wordo poni riba nomber di e sospechoso H. E persona aki, segun Polis y Ministerio Publico, ta esun cu ta papiando den e yamadanan aki cu e supuesto persona cu a duna ordo pa mata Lalo. Hof sinembargo ta bisa cu e reconocemento di e bos y e forma con a yega na e reconocimento aki (door di un Polis) no ta confiabel. Entre otro pasobra e Polis en cuestion a reconoce e stem di e grabacion despues di a scucha esun di e acusado un rato so ora cu el a wordo presenta dilanti e funcionario en cuestion.
Hof a scucha e combersacionnan telefonico aki tambe, y mescos cu e Abogado. Ta wordo mustra cu den tur tres grabacion e stem ta diferente. Den e prome audio so por bisa cu ta e acusado, unda cu el a yama unamigo pidie pa busca algo cu el a perde. Esey pasobra e co-acusado mes a declara esey. Hof ta bisa cu e combersacionnan telefonico cu supuestamente a wordo hiba entre esun cu a duna e ordo pa mata no por wordo uza como prueba. No ta reconoce cu siguransa e bos di e acusado H.
E resto di combersacionnan telefonico cu e resultadonan di DNA hunto no ta duna suficiente prueba pa conclui cu e sospechoso aki ta esun cu (su so of hunto cu
complicenan) a comete e asesinato riba ordo. Posiblemente tin otronan envolvi den e asesinato aki y no ta descarta cu otronan por a mata e victima. Esaki ta cuadra tambe den resultadonan di e investigacion forensico, unda cu por ehempel tin DNA di un tercer desconoci cu a wordo haya riba e victima y e hecho cu e telefon cu cual e combersacionnan comprometedor a wordo haci no ta di e sospechoso y tabata wordo uza tambe door di diferente otro persona .
E investigacion tabatin un cantidad di “losse eindjes”, o sea puntonan riba cual Ministerio Publico mester a haci mas investigacion, pero no a hacie.
Awor Ministerio Publico tin 14 dia pa dicidi si ta bay Casacion cu e caso aki, cu lo wordo trata na Hulanda. Mientrastanto Hof a ordena su libertad inmediato.
