Leslie Merkies: E mente “politiek-verziekt” di SKOA ta un calidad malo.

Tempo cu e ex-bankero (director general di CMB na Aruba y M&CB na Curacao) sr. Lio (Paps) Capriles, den feliz memoria, a haci e expresion skerpi cu ta parce cu na Aruba tin hopi hende cu ta “politiek-verziekt”, hopi tabata esnan cu a tum’e masha na malo. 

Pero den e expresion ey lamentablemente tabata biba un berdad grandi.

Aparentemente e custumber enfermizo aki, si nos por yame asina, ta biba den tur sector di nos comunidad, no obstante e puesto of funcion cu e persona ta posee of ocupa.

Politiek verziekt ta ora cu den tur asunto  cu mester wordo atende of discuti un hende cada bes mester hinca den su proceder su sentimento politica partidista negativo den e asunto pa simpelmente trata na daña cos of laga e asunto mustra malo, keriendo cu haciendo esey e razon lo ta na su banda.

E loke cu e directiva di SKOA a caba di haci algun dia atras relaciona cu cupo pa studiantenan cu ta bishita un MAVO scol, es decir, keda sin informa na tempo y na un manera minucioso por escrito e Ministro concerni, tocante un supuesto problema (loke no tabata e caso) relaciona cu suficiente cupo pa studiantenan cu ta bishita MAVO scol, pero si ta bay den publicidad cu mitad berdad of informacion no completo, pa despues notifica e Ministro concerni di e asunto, ta un ehemplo clasico di un SKOA cu ta “politiek-verziekt”. 

A crea e impresion robes cu no tin MAVO scol mas pa studiantenan na Aruba, pa laga e oponentenan politico y nan satelitenan bobo sigui hunga nan weganan politico partidista sushi contra e Ministro concerni.

SKOA tabata hopi bon na altura cu e supuesto problema tabata un asunto di ubicacion (unda no tin of unda tin cupo relaciona cu na unda e studiante ta biba, sea na San Nicolas y vecindario of Oranjestad y vecindario)), cu ta un asunto cu den pasado semper a wordo soluciona facilmente.

Pues, no tabata tin nodi di laga e mente “politiek verziekt” di SKOA prevalece den e asunto en cuestion.