Polisnan lo cuminsa un investigacion basta profundo a base di grabacion di video cu nan a haya. Esaki ta riba un ladronicia di auto cu a tuma lugar dilanti un cas na Caya Ernesto Petronia. For di trempan a mira cu doñonan a cuminsa manda un broadcast rond riba e auto cu a wordo horta.
Ta un Kia Optima color shinishi cu number A-28001. Hendenan tabata atento riba caya mirando e broadcast cu a bay. Mientrastanto durante dia Polis a bay na e adres den Caya Ernesto Petronia pa asina tuma e declaracion y keho official di e doño di e auto. Tambe a haya for di nan un grabacion completo di e video di seguridad. Eynan bo ta mira claramente e ladron cu a bin horta e Kia Optima A-28001.
E tabata tin un uniform bisti. Uniforma cu parce uno sea di Polis, Douane of hasta di seguridad di CMB. Combersando cu algun Polis , nan mes ta kere cu e por ta uniform di Polis pasobra tin basta uniform di Polis cu a wordo horta. Pesey mes nan lo bay profundiza nan mes den e caso aki y trata di saca afo exactamente kende e ladron uniforma aki lo ta. Mas den oranan di merdia Polisnan a wordo manda den Rudolf Arendsstraat pa un auto cu a keda para pa su cuenta. E tabata net banda di un Hardware. Ora cu Polis a yega na e sitio a topa cu e Kia Optima A-28001 para pa su cuenta pariba di un pida mondi.
E polisnan a cuminsa tira bista den e auto y a constata cu a kita e radio y coba den mas cos di e auto. Polis a busca y sigui busca rond den e mondi y a bin topa cu un martieu cu tabata den e auto. Tambe a topa cu e radio cu a wordo saca y bateria cu a wordo kita. E doño di e auto tambe a presenta. E doño di e auto a saca algun pertenencia personal y djey e Polisnan a bay cu e auto pa haci investigacion. Polis mes a coy e martieu, bateria y radio pone bek den auto pa asina ta parti di e investigacion. Mientrasanto e ladron uniforma ta canando rond.
