Ken na Aruba y ex Antias, vooral Corsou y Boneiro, no conoce La Prensa. Un vespertino cu pa decadanan largo a bin ta trece dilanti noticianan di Corsou y di region pa e publico lector.
Lamentablemente nan a publica awe nan ultimo edicion, expresando cu awe, dia 30 di November 2017, nan a publica nan ultimo edicion di e vespertino, cu lo a cumpli 60 aña dia 19 di December awo. Propietario di e corant, Chicho Jonckheer, a fayece dia 5 di April y famianan a haci tur lo posibel pa sigui cu e operacion di e corant, te ora cu haya un doño nobo. Esey tabata sin exigo. Fuera di esey, e situacion economico a haci masha dificil pa sigui cu e operacion.
Gerencia, staff y personal di La Prensa, ta yama pueblo di Corsou, Aruba y Boneiro danki pa e sosten di casi 60 aña. Tambe un danki en especial pa esnan den pasado y awor aki cu a labora cu dedicacion y amor pa produci un corant di nivel cu a informa pueblonan di e tres islanan for di 1957. Esey ta loke a wordo publica por ultimo pa e corant. Ya mañan, dia 1 di December, La Prensa no lo tey mas, lagando solamente recuerdonan di bon periodismo cu a sa di marca pauta den Antias desde su comienso.
