Kustwacht a gara boto “Daniela” marduga cu a baha 20 hende na Bushiri

Dialuna marduga banda di 4or patruya di Kustwacht a gara un boto tipo Peñero cu a caba di baha como 20 pasahero den forma ilegal na altura di Ex Bushiri Hotel. E personal di Kustwacht via radar a logra mira e contacto aki dificilmente pa motibonan cu nos lo no menciona. A sali pura den direccion di e boto di Venezuela cu e momento ey ya caba a baha e grupp di alrededor 20 pasahero.

Dimes den un situacion asina mester bay busca drechi kiko mas tin tras di e pasaheronan. Mester mira si a trece otro cosnan cu ta contra ley manera arma y droga. A haya e boto cu tres miembro di tripulacion na un distancia di cinco miya bayendo bek zuid. Nan tabata den awanan teritorial di Aruba ainda. A logra para nan y trecenan waf di Kustwacht na Savaneta. Tur tres miembro abordo lo pasa e proceso di interogacion. Tur tres ta Venezolano. Den e boto a haya diferente cos cu ta den man di autoridad pa asina wordo investiga.

E capitan logicamente mester bay carga e consecuencia di e contrabanda di hende. E ayudantenan tambe lo wordo persigui. E boto a keda confisca.  Na Aruba e hendenan aki tin un contacto cu ta facilitanan informacion pa asina por yega mas facil. Ultimo siman ta bira di dos embarcacion intercepta pa Kustwacht. A gara uno siman pasa den dia cla cu seis hende yegando Aruba den mesun area pabou banda di Malmok pero algun miya leu ainda. Nan a bisa mesora cu ta Aruba nan kier yega pasobra cos ta malo na Venezuela. Kustwacht ta keda atento riba e yegada riba e movecion di embarcacionnan clandestino cu kier yega Aruba pa sea trece hende pero tambe droga cu arma.