Minister Hodge: `Entiero di Presidente Hugo Chávez Frías tabata impaktante`

Saturday, 09 March 2013 11:22

Awe merdia Promé Minister Hodge a hasi akto di presensia na `Academia Militar` kaminda e seremonia di entiero pa Presidente Hugo Chavez a tuma luga. For di riba kaminda bajendo e `Academia Militar` nos Promé Minister a tuma nota dje fila largu di hende ku tabata para trankil pa por tuma despedida di nan lider Comandante Hugo Chavez.

Un parti ku sigur a hasi impakto riba nos Promé Minister tabata e fervor ku e multitut presente tabata tin, dor di grita konstantemente diferente trabounan i akshonnan positivo ku Hugo Chavez a hasi pa Venezuela i spesial e pobernan. E multitut presente, manera un laman kora, tabata saluda e mandatarionan ku jega ne “Academia Militar” ku gritunan di saludo duru i dje forma aki rekonosé i duna realse ne ministernan ku jega pa tuma despedida di nan Comandante Hugo Chavez. Te paden, den e espasio ku tabata reserva pa ministernan por a tende e hendenan pafo grita `Chavez Vive!`. `Esaki sigur a emoshonami` segun Minister Hodge, pasombra e hende nan aki ta konvensi ku nunka mas Venezuela i mundu por lubida Hugo Chavez. Pe grupo aki e espiritu di Hugo Chavez lo keda bibu pa semper.

Hopi di nos por tin nos opinion, pero Hugo Chavez realmente a mustra ke tabata un lider grandi pa su pueblo i ku a sabi di duna speransa bek na un grupo grandi di hendenan ku menos rekurso na Venezuela. Su foko kardinal tabata konstantemente juda e póber, juda esun ku pa aña nan a wordu lubida of laga den miseria. Minister Hodge, representando Korsou, a wordu aloka den e espasio spesialmente reserva pa prome minister nan i presidente nan dilanti dje kaha den kual a pone e kurpa di Hugo Chavez. Grandi tabata ora nan a menshona i konfirma presensia di nos pais. Aki e la sera konosi ku diferente dje lidernan di e.o. Peru, Costa Rica, Nicaragua, Trinidad, Haíti, Panama, Republika Dominicana i Bolivia. Hopi dje esnan presente no por a kontené nan lagrima durante dje seremonia i sigur ora e himno di Venezuela a zona den e sala militar. Tabata momento nan impreshonante. Bo por a sinti e tristesta ku tabata reina ku perdida di Hugo Chavez. Comandante Hugo Chavez sigur a risibi un seremonia ku un gran lider merese.

Né “Academia Militar” nos Promé Minister, meskos ku na su jegada na Venezuela un dia anterior, a bolbe risibi e trato ofisial di parti di outoridatnan di Venezuela. Durante su kaminata riba e tapeit kora komo representante di Korsou e la wordu eskorta pa militar.

Pa Minister Hodge: `Entiero di presidente Hugo Chavez tabata un eksperensha realmente emoshante`