Promé Minister Eugene Rhuggenaath a biaha pa Bruselas den e siman di 19 te ku 24 febrüari pa liderá un delegashon ministerial i partisipá na e konferensia di OCT i e foro EU-OCT. E pais i teritorionan (LGO of OCT) ta bini huntu pa deliberá riba aspektonan importnate manere integrashon regional, kambio di klima, pero tambe e invershonnan ku ta bini di Union Oropeo pa nos islanan den kuadro di Fondo di Desaroyo Oropeo (EDF 11).
Foro EU- LGO
For di 2002 e OCTs ta organisá e EU-LGO Foro huntu ku Komishon Oropeo. Durante e foro aki ta trata na yega na un sinergia i akuerdo entre e pais i teritorionan di Union Oropeo pa ku e diferente intervenshonnan i e fondonan. Riba agènda e aña aki tambe tabatin e ‘despedida’ di islanan ingles dor di ‘Brexit’ i tambe ku e akuerdo ku ta eksistí na e momentunan aki pa traha huntu ta kaduka na 2020. Durante e Foro e paisnan miembro, e komisario pa koperashon pa desaroyo i e Direktorado pa koperashon di desaroyo a partisipá. Promé ku e foro, e paisnan den reino Kòrsou, Sint-Maarten, Aruba i Hulanda na nòmber di BES tambe a bini huntu djaluna 19 febrüari pa palabra un ke otro pa e konferensia i foro.
Konferensia Ministerial di LGO
Tambe a tuma lugá un konferensia entre e lidernan polítiko di e paisnan i teritorionan OCT. Nan ta forma e organo di desishon mas haltu di OCT. Durante e konferensia a evaluá e trabounan di último periodo i tambe a papia riba fortifiká e kapasidatnan institushonal di e paisnan, a tene un mesa rondó despues di 2020 i tambe e Fondo di Desaroyo EDF 10 i e foko tematiko pa e di diesun fondo EDF 11.
Komisario Oropeo pa koperashon pa desaroyo
E paisnan i teritorionan di reino hulandes a tene un kombersashon direkto tambe ku e Komisario pa koperashon pa desaroyo Neven Mimica, kaminda e islanan por a kompartí kon nan ta eksperiensá e kolaborashon ku Union Oropeo i kiko ta importante pa nan. E tema ‘resilience’ a bini dilanti: pa hasi e islanan mas prepará i fuerte pa por enfrentá desaster natural i kambio di klima, pero tambe pa por yuda nos hendenan logra desaroyo propio i kombatí pobresa. Gobièrnu di Kòrsou ta trahando duru riba e aplikashon pa e di diesun fondo (EDF 11) pa koperashon pa desaroyo. Ku e fondonan aki por inisiá proyektonan grandi manera aworkai den kuadro di EDF 10 pa barionan di Kortijn, Tera Kora, Nieuw Nederland i Sapaté.
Kòrsou presidente OCTA 2019
Durante e konferensia ministerial a skohé un presidente i vise-presidente nobo pa representá e OCT. Pa aña 2018 a skohe Kòrsou komo vise-presidente, lokual automatikamente ta nifiká ku den aña 2019 Kòrsou lo ta presidente di e asosiashon di OCT. Durante Kòrsou su presidensia den 2019-2020 lo tuma desishonnan fundamental pa loke ta e relashon finansiero entre Union Oropeo i e paisnan i teritorionan OCT. Ta na nos promé minister Eugene Rhuggenaath pa guia e proseso importante aki huntu ku tur e otro paisnan i pa yega na e relashon deseá ku Union Oropeo despues di 2020 ora e akuerdo di Cotonou kaduká.
Dor di e konfiansa grandi di e otro paisnan i teritorionan, e representantenan di Union Oropeo i paisnan di reino den promé minister a logra ku Kòrsou pa di 2 biaha den 4 aña ta bai tuma e ròl ei riba esenario internashonal. Kòrsou tambe a keda apuntá pa ta miembro di e Komishon Ehekutivo (ExCo) di e OCT.
Bishita kòrtiku na Hulanda
Promé Minister a bishitá Vise-presidente di ‘Raad van State’ na Den Haag, señor Piet Hein Donner. Un kombersashon konstruktivo kaminda e sirbidonan di estado por a interkambia idea riba diferente tópiko, entre otro Hospital Nobo i un eventual akademia di gobernashon pa tur ambtenar na e diferente islanan den Karibe. Tambe a papia di maneho pa logra desaroyo duradero riba e islanan. Na Kas di Kòrsou a lansa di un forma festivo e revista Curaçao, kual tin komo meta pa laga mas persona i instansia sera konosí ku Kòrsou i e posibilidatnan ku ta eksistí riba nos isla.
