Dia 10 di ougùstùs 2016 a sera un akuerdo e asina yamá “Konbenio di Enseñansa, dirigí riba sirkumstansianan di labor” (Onderwijsconvenant Arbeidsomstandigheden) entre Minister di Enseñansa, Siensia Kultura i Deporte di e tempu ei i SITEK.
Riba 14 di ougùstùs 2017 e akuerdo aki a keda formalisá pa Gabinete Rhuggenaath. Despues di e formalisashon di e akuerdo, Ministerio di Enseñansa, Siensia, Kultura i Deporte a kuminsá ku ehekushon di e akuerdo.
Un aña despues di e fecha aki ya kaba diferentre trabounan ku a keda akordá entre e partidonan a keda realisá. Asina por ehèmpel tin un gran kantidat di kondishonnan di labor ku ta konta pa empleadonan públiko ku ta traha den ofisina, ku tambe a keda apliká pa e personal di enseñansa resientemente.
E kondishonnan ta konta spesialmente pa asuntunan manera:
- pago di Bonus di Pasku;
- pago di kilometer pa trabounan ehersé durante orario di trabou riba petishon di e direktiva di skol konserní;
- pago di gastunan relashoná ku aksidentenan durante orario di trabou òf na momento ku ta hasi uso di propio outo;
- kompensashon adishonal pa okupashon temporal di funshonnan di maneho di skol, kaminda solamente un persona ta apuntá den e funshon di maneho di skol;
- gratifikashon pa hubileo di e personal den enseñansa manera ta ser apliká pa e empleado públiko;
- Mitar dia liber riba fecha di kumpleaño di e personal di enseñansa;
- pago di biahe- i estadia na momento ku hasi biahe pa trabou riba invitashon di Minister òf ku pèrmit di Minister.
- Alabes tin instrukshonnan uniforme pa aplikashon di reglamentashon ku ya ta establesé pa personal di enseñansa kaminda tin atenshon pa klasifikashon salarial i promoshon, i kantidat di oranan di lès i oranan di tarea.
Den kuadro di e konbenio tambe a hasi investigashon riba eskases di personal di enseñansa (Commissie Schaarste Leerkrachten) kaminda e raportahe final di yüni 2018 a keda entregá na Minister Marilyn Alcalá-Wallé i alabes a tene un presentashon pa e titular di enseñansa.
Tin diferente Diálogonan Nashonal ku a keda organisá segun e prinsipio di Democratic Dialogue, kaminda prioridatnan a keda stipulá konhunto i tambe konferensianan pa sigui fiha direkshon den enseñansa.
E siguiente puntonan di akshon alabes ya ta den ehekushon:
- trayektonan di legislashon duradero riba tereno di seguridat di skolnan;
- otorgashon di dianan di vakashon na personal no dosente mas den e liña di vakashonnan di skol;
- institushon di un komishon di konseho di enseñansa;
- tambe ta realisando lo nesesario riba tereno di strukturashon di enseñansa di Arbeid Gericht Onderwijs (AGO) i kuido di alumno (eksterno);
Ta importante ku SITEK a bira miembro di Centrale Commissie van Vakbonden (CCvV) i partner di Georganiseerd Overleg in Ambtenarenzaken (GOA) kaminda for di e momento ei e asuntunan di posishon hurídiko den e konbenio di personal por keda tratá den un forma struktural i institushonalisá.
Lokual a keda palabrá den e konbenio ta keda ehekutá strukturalmente. E akuerdo ta den avanse. Enseñansa ta un totalidat dinámiko kaminda ta importante pa keda fihá riba e desaroyonan ku ta tuma lugá den komunidat. Nos mester keda konektá i sigui bai dilanti. Muchanan i hóbennan tin derecho riba enseñansa ku ta atraé nan, kaminda nan ta desaroyá nan talentonan i kaminda nan ta keda stimulá pa manifestá nan potensialnan. Kada miembro di personal di enseñansa tin un papel krusial i magnétiko.
